मेलबर्न, १९ जानेवारी (हिं.स.)टी-२० विश्वचषकापूर्वी पाकिस्तान दौऱ्यासाठी ऑस्ट्रेलियाने १७ सदस्यीय संघ जाहीर केला आहे. दुखापतग्रस्त कर्णधार पॅट कमिन्स, वेगवान गोलंदाज जोश हेझलवूड आणि स्फोटक फलंदाज टिम डेव्हिड यांना आगामी टी-२० विश्वचषकापूर्वी पूर्णपणे बरे होण्यासाठी दौऱ्यातून विश्रांती देण्यात आली आहे.

ऑस्ट्रेलियन निवडकर्त्यांनी लाहोरमध्ये खेळल्या जाणाऱ्या पाकिस्तानविरुद्धच्या तीन टी-२० आंतरराष्ट्रीय सामन्यांसाठी तरुण आणि अनुभवी क्रिकेटपटूंचे मिश्रण असलेला संघ निवडला आहे. बिग बॅश लीग (बीबीएल) मधील प्रभावी कामगिरीच्या आधारे पर्थ स्कॉर्चर्सचा वेगवान गोलंदाज माहली बियर्डमन आणि सिडनी सिक्सर्सचा युवा अष्टपैलू जॅक एडवर्ड्स यांना प्रथमच टी-२० संघात समावेश करण्यात आला आहे. दोन्ही क्रिकेटपटूंनी अद्याप आंतरराष्ट्रीय पदार्पण केलेले नाही. पण त्यांनी यापूर्वी भारत दौऱ्यादरम्यान व्हाईट-बॉल संघात स्थान मिळवले होते.

ब्रिस्बेन हीटचा फलंदाज मॅथ्यू रेनशॉ हा देखील पाकिस्तानविरुद्धच्या टी-२० आंतरराष्ट्रीय पदार्पणासाठी दावेदार आहे. अलिकडच्या बिग बॅश हंगामात त्याच्या प्रभावी कामगिरीचे फळ मिळाले आहे. रेनशॉने गेल्या दोन बीबीएल हंगामात ६०४ धावा केल्या आहेत आणि त्याची सरासरी ३५.५३ आहे.

जॅक एडवर्ड्स सध्या सिडनी सिक्सर्ससाठी सर्वाधिक विकेट घेणारा गोलंदाज आहे. त्याने सध्याच्या बिग बॅशमध्ये १५ विकेट्स घेतल्या आहेत. दरम्यान, २० वर्षीय महली बियर्डमनने त्याच्या पहिल्या पूर्ण बीबीएल हंगामात आठ विकेट्स घेऊन पर्थ स्कॉर्चर्सना अव्वल स्थानावर पोहोचवण्यात महत्त्वाची भूमिका बजावली.

निवड समितीचे अध्यक्ष जॉर्ज बेली म्हणाले, ही मालिका निवडीच्या उंबरठ्यावर असलेल्या क्रिकेटपटूंसाठी एक उत्तम संधी आहे. यामुळे काही तरुण क्रिकेटपटूंना त्यांच्या विश्वचषक संघात अनुभव मिळविण्याची संधी देखील मिळेल.

पाकिस्तानविरुद्धच्या मालिकेतील तीन टी-२० सामने २९, ३१ जानेवारी आणि १ फेब्रुवारी रोजी लाहोरच्या ते गद्दाफी स्टेडियमवर खेळवले जातील. या दौऱ्यातील १७ पैकी दहा क्रिकेटपटू टी-२० विश्वचषक संघाचा भाग आहेत.

ऑस्ट्रेलियाला विश्वास आहे की, जोश हेझलवूड (हॅमस्ट्रिंग) आणि टिम डेव्हिड (हॅमस्ट्रिंग) टी-२० विश्वचषकाच्या सुरुवातीला तंदुरुस्त असतील. दरम्यान, पॅट कमिन्सच्या पाठीच्या दुखापतीतून बरे होण्याबाबत संघ व्यवस्थापन संयम बाळगत आहे आणि आशा आहे की, तो स्पर्धेच्या अंतिम टप्प्यात महत्त्वाची भूमिका बजावू शकेल. टी-२० विश्वचषकात, ऑस्ट्रेलिया त्यांचे गट सामने श्रीलंकेत खेळेल, तर संघ सुपर ८ टप्प्यात पोहोचल्यानंतर भारतात येईल.

पाकिस्तान दौऱ्यासाठीचा ऑस्ट्रेलियन टी-२० संघ:

मिशेल मार्श (कर्णधार), शॉन अ‍ॅबॉट, झेवियर बार्टलेट, महली बियर्डमन, कूपर कॉनोली, बेन द्वारशुइस, जॅक एडवर्ड्स, कॅमेरून ग्रीन, ट्रॅव्हिस हेड, जोश इंग्लिस, मॅथ्यू कुहनेमन, मिच ओवेन, जोश फिलिप, मॅथ्यू रेनशॉ, मॅट शॉर्ट, मार्कस स्टोइनिस आणि अ‍ॅडम झांपा.

हिंदुस्थान समाचार / वृषाली देशपांडे