कॅनबेरा , 02 जानेवारी (हिं.स.)।ऑस्ट्रेलियाचे दिग्गज डावखुरे फलंदाज उस्मान ख्वाजा यांनी अधिकृतपणे जाहीर केले आहे की इंग्लंडविरुद्ध सिडनी येथे खेळला जाणारा पाचवा अ‍ॅशेस कसोटी सामना हा त्यांच्या आंतरराष्ट्रीय कारकिर्दीतील ८८वा आणि अखेरचा कसोटी सामना असेल. शुक्रवारी सकाळी एससीजीवर झालेल्या पत्रकार परिषदेत उस्मान ख्वाजा यांनी निवृत्तीची घोषणा केली. यावेळी त्यांचे आई-वडील, पत्नी रेचल आणि त्यांची दोन्ही मुलेही उपस्थित होती.

ख्वाजा यांनी सांगितले की, प्रशिक्षण सत्राच्या अगदी आधीच त्यांनी हा निर्णय आपल्या सहकाऱ्यांना कळवला होता. ते म्हणाले, “मी संघाला ही माहिती देताच स्वतःला सावरू शकलो नाही. मला वाटले नव्हते की मी रडेन, पण डोळ्यांतून अश्रू आले. यावरून हा प्रवास माझ्यासाठी किती महत्त्वाचा आहे, हे कळते.”

उस्मान ख्वाजांची आंतरराष्ट्रीय कारकीर्द तब्बल १५ वर्षांची राहिली, मात्र हा प्रवास सोपा नव्हता. २०११ मध्ये कसोटी पदार्पण करणाऱ्या ख्वाजांना अनेकदा संघाबाहेर बसवण्यात आले. ऑस्ट्रेलियन क्रिकेटच्या इतिहासातील सर्वाधिक वेळा वगळले गेलेल्या खेळाडूंमध्ये त्यांची गणना होते. याबाबत ते स्वतः म्हणाले, “माझा प्रवास इतर खेळाडूंहून वेगळा राहिला. आज अनेक भावना एकाच वेळी बाहेर आल्या.”

वयाच्या २४व्या वर्षी कसोटी पदार्पण करणारे उस्मान ख्वाजा ऑस्ट्रेलियन क्रिकेटच्या अस्थिर आणि संक्रमणाच्या काळात आशेचा किरण बनून पुढे आले होते. २०१०–११ अ‍ॅशेस मालिकेतील अखेरच्या, औपचारिक सामन्यात दुखापतग्रस्त रिकी पॉन्टिंग यांच्या जागी त्यांनी क्रमांक तीनवर फलंदाजी करताना ३७ आणि २१ धावा केल्या. त्याच खेळीपासून त्यांच्या कारकिर्दीची सुरुवात झाली.

दीर्घ स्वरूपातील क्रिकेटमधून निवृत्ती घेताना ते ऑस्ट्रेलियाच्या त्या निवडक १८ फलंदाजांमध्ये सामील होत आहेत, ज्यांनी कसोटी क्रिकेटमध्ये १५ पेक्षा अधिक शतके झळकावली आहेत. सध्या त्यांच्या नावावर १६ कसोटी शतके आहेत. याशिवाय मर्यादित षटकांच्या क्रिकेटमध्ये त्यांनी ४९ सामने खेळले असून त्यांच्या खात्यात दोन एकदिवसीय शतके आहेत.

---------------

हिंदुस्थान समाचार / Priyanka Bansode