अकोला, 03 जानेवारी (हिं.स.)।

महिले सोबत गैरवर्तन केल्याप्रकरणी रामदासपेठ पोलीस ठाण्यात नेमणुकीवर असलेले पोलीस उपनिरीक्षक शंकर सुरेश बोंडे यांना अखेर शासकीय सेवेतून निलंबित करण्यात आले आहे. या प्रकरणाची पोलीस अधीक्षक अर्चित चांडक यांनी गंभीर दखल घेतली असून, विभागीय चौकशीनंतर भारतीय संविधान अनुच्छेद 311 (ब) अंतर्गत पोलीस दलातून बडतर्फीचा प्रस्ताव सादर करण्यात येणार असल्याची माहिती सूत्रांनी दिली आहे.

दि. 02 जानेवारी 2026 रोजी सायंकाळी साडेचारच्या सुमारास, बाळापूर नगर परिषदेतून अकोल्याकडे जात असताना शेळद फाटा परिसरात आरोपी पोलीस उपनिरीक्षक शंकर बोंडे याने फिर्यादी महिलेचा पाठलाग केला. व्याळा गावाजवळ त्याने गाडी आडवी लावत अशोभनीय इशारे केल्याचा आरोप आहे. फिर्यादी पुढे निघून गेल्यानंतरही आरोपीने पुन्हा पाठलाग करत तिला थांबवण्याचा प्रयत्न केला. या प्रकारामुळे फिर्यादी महिलेला मानसिक त्रास व लज्जा सहन करावी लागली.

या घटनेनंतर फिर्यादीने पोलीस स्टेशन बाळापूर येथे तक्रार दाखल केली. त्यानुसार अपराध क्रमांक 02/26 अंतर्गत भारतीय न्याय संहिता कलम 78, 79 व 126 (2) नुसार गुन्हा दाखल करण्यात आला असून, प्रकरणाचा पुढील तपास सुरू आहे. विशेष बाब म्हणजे, सदर आरोपी अधिकारी हा घटना घडली त्या वेळी कर्तव्यावर गैरहजर असल्याचेही निष्पन्न झाले आहे.

पोलीस उपनिरीक्षकसारख्या जबाबदार पदावर असताना कायद्याचे पूर्ण ज्ञान असूनही, असे कृत्य करणे हे अत्यंत अशोभनीय, अनुशासनहीन व नैतिक अधःपतनाचे असल्याचे पोलीस प्रशासनाने स्पष्ट केले आहे.

या घटनेमुळे पोलीस दलाची प्रतिमा जनमानसात मलीन झाल्याने, आरोपी अधिकारीविरुद्ध कठोर कारवाईचा निर्णय घेण्यात आला.

महत्वाचे म्हणजे, शंकर सुरेश बोंडे यांच्याविरोधात यापूर्वीही गैरवर्तनाच्या तक्रारी प्राप्त झालेल्या असल्याची माहिती आहे. या पार्श्वभूमीवर पोलीस अधीक्षक अर्चित चांडक यांनी प्रकरण गांभीर्याने घेत, निलंबनासोबतच बडतर्फीपर्यंतची कारवाई करण्याचे संकेत दिले आहेत.

दरम्यान, महिलांविषयी गैरवर्तन करणाऱ्या खाजगी किंवा शासकीय कोणत्याही व्यक्तीला माफ केले जाणार नाही, असा स्पष्ट इशारा पोलीस अधीक्षक अकोला यांनी या कारवाईतून सर्व अधिकारी व अंमलदारांना दिला आहे.

---------------

हिंदुस्थान समाचार / जयेश गावंडे