बीड, 06 जानेवारी (हिं.स.)। सोशल मीडियाच्या इंस्टाग्राम अकाउंटवर आक्षेपार्ह पोस्ट व्हायरल करून समाजात तेढ निर्माण करणाऱ्या विरुद्ध केज पोलिसात गुन्हा दाखल करण्यात आला आहे.

केज तालुक्यातील चिंचोली माळी येथील भीमा कोरेगाव येथील युवकाने शौर्य दिनाच्या निमित्ताने स्टेटस ठेवले होते. त्याच्या मोबाईलच्या इंस्टाग्राम या सोशल मीडियाच्या अकाउंटच्या स्टेटसला जाणीवपूर्वक भीमा कोरेगाव येथील शौर्य दिनाच्या निमित्ताने एका समाजाच्या भावना भडकाविण्याच्या वाईट उद्देशाने आणि दोन समाजात व दोन जातीत तेढ निर्माण होऊन सामाजिक सलोखा बिघडून कायदा सुव्यवस्था बिघडविण्याच्या उद्देशाने एक आक्षेपार्ह मजकूर व्हायरल केला होता.

त्यामुळे केज येथील विविध पक्षांचे कार्यकर्ते आणि सामाजिक कार्यकर्ते यांच्यासह स्वाभिमानी युथ रिपब्लिकन पार्टीचे कार्यकर्त्यांनी पोलिस निरीक्षक यांची भेट घेतली आणि दोन समाजात तेढ निर्माण करणाऱ्या विरुद्ध कारवाई करण्याची मागणी केली होती. दरम्यान, स्वाभिमानी युथ रिपब्लिकन पार्टीचे बीड जिल्हाध्यक्ष यांच्या फिर्यादीवरून रोहन गलांडे विरुद्ध भा. न्या. सं. १८६ (१), २९९ नुसार केज ठाण्यात गुन्हा दाखल करण्यात आला आहे. पोलिस निरीक्षक स्वप्नील उनवणे यांच्या मार्गदर्शनाखाली जमादार तुकाराम मुरकुटे हे तपास करीत आहेत.

---------------

हिंदुस्थान समाचार / Aparna Chitnis