नाशिक, 23 फेब्रुवारी (हिं.स.) : फेडरेशन ऑफ मोटर स्पोर्टस क्लब ऑफ इंडियाच्या (एफएमएससीआय) मान्यतेने होणाऱ्या इंडियन नॅशनल रॅली चॅम्पियनशिप (आयएनआरसी) 2025 स्पर्धेची सहावी फेरी नाशिक येथे रंगणार आहे. Western India Sports Association (विसा) यांच्या वतीने 27 फेब्रुवारी ते 1 मार्च दरम्यान ‘रॅली ऑफ महाराष्ट्र’ (ब्लू बॅन्ड एफएमएससीआय फोर व्हिलर आयएनआरसी 2025) आयोजित करण्यात येत असून स्पर्धेची सर्व तयारी पूर्ण झाली आहे.
अव्वल व उपविजेतेपदासाठी चुरस
मंगळूरचा अव्वल चालक Dean Mascarenhas आपल्या सहचालक करूमबाह गगनसह पुन्हा एकदा विजेतेपदासाठी सज्ज झाला आहे. मागील पाच फेऱ्यांमध्ये वर्चस्व राखलेल्या डीनसमोर या सहाव्या फेरीतही विजेतेपदाची संधी आहे.
उपविजेतेपदासाठी Karun Kadur – मुसा शेरीफ आणि आदित्य ठाकूर – विरेंद्र कश्यप यांच्यात चुरशीची लढत अपेक्षित आहे. आयएनआरसी-3 गटात बी. वैशाख, चिरनाथ जैन तर आयएनआरसी-2 गटात फबीद अहमद – जॉर्ज मिलेन जोडी विजेतेपदासाठी दावेदार मानली जात आहे.
34 प्रवेशिका; महिला संघांचाही सहभाग
यंदाच्या रॅलीत एकूण 34 प्रवेशिका नोंदविण्यात आल्या असून महिला संघांचाही उत्साही सहभाग आहे. चेटीचंड स्पोर्टिंग क्लबच्या मुरली अथिरा – चकालीयाल अरुण या महिला चालकांची जोडी विशेष आकर्षण ठरणार आहे. महिलांच्या वाढत्या सहभागामुळे ‘वुमन्स पॉवर, नेशन पॉवर’चा संदेशही अधोरेखित होत आहे.
आयोजनाची जय्यत तयारी
विसाचे हे रौप्यमहोत्सवी वर्ष असून या वर्षी आयएनआरसी फेरीचे आयोजन करण्याचा मान संस्थेला मिळाल्याने ही अभिमानाची बाब मानली जात आहे. सपकाळ नॉलेज हब येथे मुख्यालय उभारण्यात आले असून वाहन व कागदपत्र तपासणी सुरू आहे. 25 फेब्रुवारीपर्यंत बहुतांश स्पर्धक नाशिकमध्ये दाखल होण्याची शक्यता आहे.
त्र्यंबकरस्त्यावर रॅलीचे फलक लावून वातावरणनिर्मिती करण्यात आली आहे. ग्रेप काउंटी परिसरातील ‘सुपर स्पेशल स्टेज’ नाशिककरांसाठी खास आकर्षण ठरणार आहे. पोलिसांचा चोख बंदोबस्त ठेवण्यात येणार असून पालघर, त्र्यंबकेश्वर परिसरातील अवघड घाटरस्त्यांवर चालकांच्या कौशल्याची खरी कसोटी लागणार आहे.
छायाचित्रकारांसाठी खास पारितोषिक योजना
रॅलीतील थरार टिपण्यासाठी हौशी व व्यावसायिक छायाचित्रकारांसाठी विशेष पारितोषिक योजना जाहीर करण्यात आली आहे. वर्तमानपत्रांत प्रसिद्ध होणाऱ्या स्टिल व अॅक्शन छायाचित्रांना प्रथम (₹5000), द्वितीय (₹3000) व तृतीय (₹2000) अशी बक्षिसे दिली जाणार आहेत.
एकूणच, नाशिकमध्ये होणारी ‘रॅली ऑफ महाराष्ट्र’ ही क्रीडारसिकांसाठी वेग, कौशल्य आणि रोमांच यांचा संगम ठरणार असून शहरात मोटरस्पोर्ट्सचा जल्लोष पाहायला मिळणार आहे.--------------------
हिंदुस्थान समाचार / GOSAVI CHANDRASHEKHAR SUKDEV
