वॉशिंग्टन , 25 फेब्रुवारी (हिं.स.)।अमेरिकेचे राष्ट्राध्यक्ष डोनाल्ड ट्रम्प यांनी अमेरिकन संसदेला संबोधित करताना भारत-पाकिस्तान संघर्षाबाबत मोठे विधान केले. ट्रम्प यांनी दावा केला की, त्यांनी हस्तक्षेप केला नसता तर दोन्ही देशांमध्ये अणुयुद्ध होऊ शकले असते आणि सुमारे ३.५ कोटी लोकांचा मृत्यू झाला असता. ही माहिती पाकिस्तानचे पंतप्रधान शहबाज शरीफ यांनी स्वतः त्यांना दिल्याचेही त्यांनी म्हटले आहे.

आपल्या भाषणात ट्रम्प म्हणाले की, कार्यकाळाच्या पहिल्या दहा महिन्यांत त्यांनी आठ युद्धे थांबवली. भारत आणि पाकिस्तान यांच्यातील परिस्थिती इतकी गंभीर झाली होती की ती अणु संघर्षापर्यंत पोहोचू शकली असती, असेही त्यांनी नमूद केले. ट्रम्प यांच्या मते, वॉशिंग्टनच्या मध्यस्थीनंतर दोन्ही देशांनी युद्धबंदीवर सहमती दर्शवली.

याशिवाय त्यांनी इस्रायल-इराण, आर्मेनिया-अझरबैजान, काँगो-रवांडा तसेच कंबोडिया-थायलंड यांच्यातील संघर्षही थांबविल्याचा दावा केला. त्यांनी स्टीव्ह विटकॉफ, जॅरेड कुशनर आणि परराष्ट्रमंत्री मार्को रुबियो यांचेही कौतुक केले. ट्रम्प यापूर्वीही अनेकदा भारत-पाकिस्तान संभाव्य युद्ध टाळण्यात आपली महत्त्वाची भूमिका असल्याचा दावा करत आले आहेत. गेल्या वर्षी १० मेनंतर त्यांनी ८० पेक्षा अधिक वेळा या संघर्षाला आळा घातल्याचे श्रेय घेतले आहे. “बोर्ड ऑफ पीस”सारख्या कार्यक्रमांमध्ये आणि विविध प्रसंगी त्यांनी हा दावा पुन्हा केला आहे. मात्र, काही वेळा त्यांनी आपल्या वक्तव्यांमध्ये बदलही केले आहेत.

अमेरिकेचे राष्ट्राध्यक्ष म्हणत आले आहेत की त्या काळात परिस्थिती अत्यंत गंभीर होती आणि त्यांच्या पुढाकारामुळे मोठा संघर्ष टळला. मात्र, भारताने हा दावा सातत्याने फेटाळून लावला आहे. परराष्ट्र मंत्रालयाने स्पष्ट केले होते की कोणत्याही तिसऱ्या पक्षाच्या हस्तक्षेपामुळे शत्रुत्व थांबले नाही; हा निर्णय दोन्ही शेजारी देशांच्या डीजीएमओ स्तरावरील चर्चेनंतर घेण्यात आला होता.

---------------

हिंदुस्थान समाचार / Priyanka Bansode