तेहरान , 01 मार्च (हिं.स.)।इराणचे सर्वोच्च नेते सय्यद अयातुल्ला अली खामेनेई यांच्या रविवारी मृत्यूची अधिकृत पुष्टी झाल्यानंतर संपूर्ण मध्य-पूर्वेत मोठे युद्ध भडकले आहे.इराण आपल्या सर्वोच्च नेते अयातुल्ला अली खामेनेई यांच्या मृत्यूचा बदला घेत आहे. इराणने अमेरिकेचे सहयोगी असलेल्या संयुक्त अरब अमिरात (यूएई) आणि कतारमध्ये मोठ्या प्रमाणावर हल्ले केले आहेत. माध्यमांच्या वृत्तानुसार, इराणने मध्य-पूर्वेत इस्रायल आणि अमेरिकन तळांवर बॅलिस्टिक क्षेपणास्त्रे आणि ड्रोनद्वारे व्यापक हल्ले सुरू केले आहेत.

यूएई आणि कतार हे अमेरिकेचे सहयोगी देश आहेत. इराणच्या ताज्या हल्ल्यांदरम्यान दुबई आणि कतारची राजधानी दोहा यांच्या आकाशात अनेक जोरदार स्फोटांचे आवाज ऐकू आले.

इराणचा हा हल्ला शेजारी देशांना स्पष्ट संदेश देण्यासाठी असल्याचे मानले जात आहे—की यूएई आणि कतार यांनी आपल्या शत्रूंचा साथ दिल्यास त्याचे परिणाम भोगावे लागतील.

इस्लामिक रिव्होल्युशनरी गार्ड कॉर्प्स (आयआरजीसी) ने म्हटले आहे की ‘ऑपरेशन ट्रू प्रॉमिस’च्या पाचव्या टप्प्यात अमेरिकन जहाजांसाठी दारुगोळा वाहून नेणाऱ्या एका जहाजावर जेबेल अली अँकरज येथे चार ड्रोनने हल्ला केला. या स्फोटांमुळे ते जहाज पूर्णपणे निष्क्रिय झाले. आयआरजीसीच्या दाव्यानुसार, “इराणने कुवैतमधील अब्दुल्ला मुबारक परिसरातील अमेरिकन नौदल तळावर ४ बॅलिस्टिक क्षेपणास्त्रे आणि १२ ड्रोनद्वारे हल्ला केला. या हल्ल्यात संपूर्ण पायाभूत सुविधा उद्ध्वस्त झाली असून मोठ्या संख्येने अमेरिकन सैनिक ठार झाले आणि अनेक जखमी झाले.”

इराणकडून पुढे सांगण्यात आले की, “आयआरजीसी नौदल आणि वायुसेना मिळून शत्रू दलांसाठी नरकाचे दरवाजे उघडे ठेवतील.” इराणने असेही म्हटले आहे की, “एमएसटी-श्रेणीचे कॉम्बॅट सपोर्ट जहाज, जे हिंद महासागरात अमेरिकन जहाजांसाठी इंधन घेऊन जात होते, त्याला इराणच्या ३८० क्षेपणास्त्रांनी लक्ष्य केले.”

जगातील सर्वाधिक वर्दळीच्या विमानतळांपैकी एक असलेल्या दुबई आंतरराष्ट्रीय विमानतळावरही इराणने हल्ला केला आहे. इस्रायल-अमेरिका आणि इराण यांच्यात युद्ध सुरू झाल्यानंतर यूएईने तो आधीच बंद केला होता. यापूर्वी इराणने दुबईतील प्रसिद्ध कृत्रिम बेट पाम जुमेराह आणि आलिशान हॉटेल बुर्ज अल अरब यांनाही लक्ष्य केले होते.

इराणी हल्ल्यांच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा कडक इशारा दिला आहे. त्यांनी म्हटले आहे की, यावेळी इराणवर असा हल्ला केला जाईल, जो यापूर्वी कधीही पाहिला गेला नसेल. दुसरीकडे, इराणकडून इस्रायलसह संपूर्ण मध्य-पूर्वेतील अमेरिकन तळांवर सातत्याने हल्ले सुरू आहेत. तर इराणपासून बगदादपर्यंत खामेनेई यांच्या निधनाबद्दल शोक व्यक्त करण्यासाठी लोक रस्त्यावर उतरले आहेत.

---------------

हिंदुस्थान समाचार / Priyanka Bansode