नवी दिल्ली, 19 मार्च (हिं.स.)भारतीय संघाचा मुख्य निवडकर्ता, अजित आगरकर यांनी भारतीय क्रिकेट नियामक मंडळाकडे (बीसीसीआय) आपला कार्यकाळ २०२७ च्या एकदिवसीय विश्वचषकापर्यंत वाढवण्याची विनंती केली आहे. २०२५ च्या चॅम्पियन्स ट्रॉफी आणि २०२४ च्या टी-२० विश्वचषकातील भारताच्या विजयाचे बक्षीस म्हणून आयपीएल २०२५ च्या अगदी आधी आगरकर याचा करार एका वर्षासाठी वाढवण्यात आला होता. आता, टी-२० विश्वचषकातील भारताच्या मायदेशातील विजयानंतर, आगरकर यांचा कार्यकाळ २०२७ च्या एकदिवसीय विश्वचषकापर्यंत वाढवण्याची विनंती मंडळाला प्राप्त झाल्याची माहिती समोर आली आहे.

या विषयावर आधीच चर्चा झाली आहे. जागतिक कसोटी चॅम्पियनशिपच्या निर्णायक टप्प्यात प्रवेश करत असताना आणि पुढील वर्षीच्या एकदिवसीय विश्वचषकाची तयारी सुरू करत असताना, बीसीसीआय आगरकर यांची विनंती मान्य करेल की नाही, हे पाहणे बाकी आहे.

आगरकर याच्या जागी पश्चिम विभागातील आणखी एक माजी भारतीय क्रिकेटपटू आघाडीवर असल्याचे संकेत होते, पण या दिशेने अद्याप कोणतीही ठोस घडामोड झालेली नाही. आगरकर जून २०२३ पासून पुरुष वरिष्ठ निवड समितीचे अध्यक्ष आहेत आणि त्यांच्या कार्यकाळात भारताने दोन टी-२० विश्वचषक आणि एक चॅम्पियन्स ट्रॉफीसह तीन आयसीसी विजेतेपदे जिंकली आहेत. पण कसोटी सामन्यांमधील निकाल अपेक्षेप्रमाणे लागलेले नाहीत. भारताने मायदेशात सलग दोन मालिका गमावल्या आहेत आणि परदेशात बॉर्डर-गावस्कर ट्रॉफीही गमावली आहे. यामुळे व्हाईट-बॉल क्रिकेटमधील त्यांच्या यशावर काहीसा परिणाम झाला आहे, जिथे भारताने ३३ पैकी केवळ दोन सामने गमावले आहेत आणि २०२३ व २०२५ चे आशिया कपही जिंकले आहेत.

---------------

हिंदुस्थान समाचार / वृषाली देशपांडे