मुंबई, 02 मार्च (हिं.स.)। दाक्षिणात्य चित्रपटसृष्टीतील सुपरस्टार सूर्या पुन्हा एकदा मोठ्या पडद्यावर धमाल उडवण्यासाठी सज्ज झाले आहेत. त्यांच्या बहुप्रतीक्षित चित्रपटाला, जो आतापर्यंत ‘सूर्या 46’ या नावाने ओळखला जात होता, अधिकृतपणे ‘विश्वनाथ एंड संस’ असे शीर्षक जाहीर करण्यात आले आहे. निर्मात्यांनी चित्रपटाचे पहिले पोस्टर प्रदर्शित केले असून, त्यामुळे प्रेक्षकांमध्ये उत्सुकता आणखी वाढली आहे.

जाहीर करण्यात आलेल्या पोस्टरमध्ये सूर्या एका उंच इमारतीच्या आत उभे दिसत आहेत आणि त्यांच्या कुशीत एक लहान मूल आहे. दोघांच्या चेहऱ्यावर हलकी स्मितरेषा दिसत असून, ती चित्रपटाच्या भावनिक कथानकाची झलक देते. हा चित्रपट कौटुंबिक आणि भावनिक धाटणीचा असल्याचे सांगितले जात आहे. नातेसंबंधांची खोली आणि भावनांची गुंफण यांना या कथेत विशेष महत्त्व दिले जाणार आहे. चित्रपटाचे दिग्दर्शन वेंकी एटलुरी करत आहेत.

या चित्रपटात सूर्या यांच्यासोबत रवीना टंडन आणि ममिता बैजू या देखील महत्त्वाच्या भूमिकांमध्ये झळकणार आहेत. ‘विश्वनाथ एंड संस’ हा चित्रपट जुलै 2026 मध्ये प्रदर्शित होणार असून, अद्याप नेमकी प्रदर्शित तारीख जाहीर करण्यात आलेली नाही.

---------------

हिंदुस्थान समाचार / Suraj Chaugule