इस्लामाबाद , 23 मार्च (हिं.स.)। गेल्या काही दिवसांपासून पाकिस्तानचे माजी पंतप्रधान इम्रान खान यांच्या प्रकृतीबद्दल चिंता व्यक्त केली जात आहे. दरम्यान, इम्रान खान यांचे पुत्र कासिम खान यांनी रावळपिंडीच्या अदियाला तुरुंगात त्यांची भेट घेतली. या भेटीनंतर कासिमने आपल्या वडिलांचा एक संदेश सोशल मीडियावर शेअर केला. या संदेशात इम्रान खान यांनी पाकिस्तानच्या न्यायव्यवस्थेवर आणि सरकारवर गंभीर आरोप केले आहेत.

आपल्या मुलामार्फत पाठवलेल्या संदेशात इम्रान खान म्हणाले, देशाच्या न्यायाधीशांना लाज वाटली पाहिजे. त्यांनी आरोप केला की न्यायव्यवस्थेने आपला आत्मा विकला आहे आणि तिला राष्ट्राच्या एकतेची काहीही पर्वा नाही. इम्रान यांच्या मते, जेव्हा त्यांचे विरोधक त्यांना मानसिकदृष्ट्या खचवण्यात अयशस्वी झाले, तेव्हा त्यांनी त्यांच्या पत्नी बुशरा बीबी यांना लक्ष्य करण्यास सुरुवात केली. त्यांनी बुशरा बीबी यांच्यासोबत झालेल्या वागणुकीला अमानवीय आणि इस्लामविरोधी म्हटले. इम्रान म्हणाले की, हा त्यांना ब्लॅकमेल करण्याचा एक कट होता. तुरुंगातील हालअपेष्टांचे वर्णन करताना इम्रान खान म्हणाले की, आपल्या मुलांच्या ३० मिनिटांच्या भेटीऐवजी त्यांना २४ तास एकांतवासात राहावे लागते. त्यांनी न्यायाधीशांना गद्दार म्हटले आणि म्हणाले की, समाजाला न्याय देण्याची जबाबदारी असलेलेच त्यांचा विश्वासघात करत आहेत. त्यांना स्वतःची लाज वाटली पाहिजे.

इम्रान खान यांचे दोन मुलगे, सुलेमान आणि कासिम, लंडनमध्ये राहतात. त्यांनी यापूर्वी दावा केला होता की त्यांच्या वडिलांच्या उजव्या डोळ्याची दृष्टी मोठ्या प्रमाणात खालावली होती आणि तुरुंग प्रशासन त्यांच्या उपचारात हलगर्जीपणा करत होते. माध्यमांना दिलेल्या एका मुलाखतीत कासिमने असेही सांगितले की, पाकिस्तानला भेट दिल्यास इम्रान खान यांच्याकडे जागतिक लक्ष वेधले जाईल या भीतीमुळे सरकार त्याला व्हिसा नाकारत होते. तथापि, नंतर त्याला व्हिसा मंजूर करण्यात आला.काही दिवसांपूर्वी, इम्रान खानचे वकील लतीफ खोसा यांनी खान यांना उपचारासाठी रुग्णालयात पाठवण्याची विनंती करणारी याचिका न्यायालयात दाखल केली. मिळालेल्या माहितीनुसार, इम्रान गेल्या वर्षी ऑक्टोबरपासून डोळ्यांच्या आजाराने त्रस्त आहेत. दरम्यान, सरकारने दावा केला आहे की उपचारानंतर त्यांची दृष्टी सुधारली आहे. ७२ वर्षीय इम्रान खान ऑगस्ट २०२३ पासून भ्रष्टाचाराच्या प्रकरणात तुरुंगात आहेत

---------------

हिंदुस्थान समाचार / Priyanka Bansode