वॉशिंग्टन , 24 मार्च (हिं.स.)।अमेरिकेच्या परराष्ट्र विभागाने म्हटले आहे की, इराण समर्थित दहशतवादी संघटना इराकमध्ये अमेरिकन नागरिक आणि अमेरिकेशी संबंधित ठिकाणांवर व्यापक हल्ले करत आहेत. विभागाने आपल्या नागरिकांना तात्काळ इराक सोडण्याचा सल्ला दिला आहे.

सोशल मीडिया प्लॅटफॉर्म एक्सवर शेअर केलेल्या निवेदनात म्हटले आहे, “इराकमध्ये इराण समर्थित दहशतवाद्यांनी अमेरिकन नागरिक आणि अमेरिकेशी संबंधित लक्ष्यांवर व्यापक हल्ले केले आहेत, ज्यामध्ये इराकी कुर्दिस्तान प्रदेशाचाही समावेश आहे. अमेरिकन नागरिकांनी तातडीने इराक सोडावा. इराकमधील अमेरिकन मिशन नागरिकांच्या मदतीसाठी खुले आहे.”

निवेदनात पुढे म्हटले आहे की, सध्याच्या सुरक्षा धोक्यांचा विचार करता बगदाद येथील अमेरिकन दूतावास किंवा एरबिल येथील वाणिज्य दूतावासात जाण्याचा प्रयत्न करू नये, कारण इराकच्या हवाई क्षेत्रात क्षेपणास्त्र, ड्रोन आणि रॉकेट हल्ल्यांचा धोका कायम आहे. सर्व नियमित वाणिज्यदूत सेवा, ज्यामध्ये व्हिसा सेवांचाही समावेश आहे, सध्या स्थगित करण्यात आल्या आहेत. आपत्कालीन परिस्थितीत अमेरिकन नागरिकांनी संबंधित ईमेलद्वारे संपर्क साधावा, असा सल्ला देण्यात आला आहे.

अमेरिकन दूतावासाने आपल्या नागरिकांना इराकला प्रवास न करण्याचा इशारा पुन्हा दिला असून कोणत्याही कारणासाठी इराकला जाऊ नये, आणि जर तेथे उपस्थित असतील तर तात्काळ देश सोडावा, असे म्हटले आहे. यापूर्वी शनिवारी अमेरिकेच्या परराष्ट्र विभागाने आपल्या नागरिकांसाठी जागतिक स्तरावरील इशारा जारी केला होता. त्यामध्ये इराण समर्थक गट अमेरिकन नागरिकांना लक्ष्य करू शकतात, असे नमूद करण्यात आले होते.

इशाऱ्यात पुढे म्हटले आहे, “जगभरात, विशेषतः पश्चिम आशियामध्ये असलेल्या अमेरिकन नागरिकांनी अतिरिक्त सतर्कता बाळगावी. परदेशात राहणाऱ्या अमेरिकन नागरिकांनी जवळच्या अमेरिकन दूतावास किंवा वाणिज्य दूतावासाने जारी केलेल्या सुरक्षा सूचनांचे पालन करावे. वेळोवेळी हवाई क्षेत्र बंद केल्यामुळे प्रवासावर परिणाम होऊ शकतो.”

---------------

हिंदुस्थान समाचार / Priyanka Bansode