बीड, 26 मार्च (हिं.स.)।
बीड शहर पोलिसांनी मागील दोन महिन्यांपासून बेपत्ता असलेल्या तीन अल्पवयीन मुलींचा शोध घेऊन त्यांची सुखरूप घरवापसी करण्यात मोठे यश मिळवले आहे. पोलीस अधीक्षक नवनीत कावत आणि अपर पोलीस अधीक्षक सचिन पांडकर यांच्या मार्गदर्शनाखाली पोलीस निरीक्षक शितलकुमार बल्लाळ यांच्या पथकाने ही कौतुकास्पद कामगिरी केली. तांत्रिक तपासाच्या आधारे पोलिसांनी एका मुलीचा शोध थेट नांदेडमधून लावला, जिने एका अनोळखी व्यक्तीच्या इंस्टाग्राम खात्यावरून संदेश पाठवला होता. केवळ शोधच नाही, तर या मुलींचे पोलीस आणि बालकल्याण विभागातर्फे प्रभावी समुपदेशन करून त्यांना सुरक्षितपणे पालकांच्या स्वाधीन करण्यात आले आहे. अनेकदा घरगुती वाद आणि संवादाच्या अभावामुळे किशोरवयीन मुली घर सोडण्याचे पाऊल उचलतात, असे निरीक्षण पोलिसांनी नोंदवले आहे. या पार्श्वभूमीवर पालकांनी मुलांशी मैत्रीपूर्ण नाते जपून त्यांच्या सोशल मीडिया वापराबाबत सतर्क राहावे, असे आवाहन प्रशासनाने केले असून पोलिसांच्या या संवेदनशील भूमिकेचे सर्वत्र कौतुक होत आहे.
---------------
हिंदुस्थान समाचार / Aparna Chitnis
