रायगड, 26 मार्च (हिं.स.) : अलिबाग-रेवदंडा बायपास रस्त्याच्या अपग्रेडिंगच्या कामामुळे चेंढरे येथील चिंतामणराव केळकर विद्यालयासमोर गंभीर समस्या निर्माण झाली आहे. रस्ते विकासाच्या कामादरम्यान नैसर्गिक पाण्याच्या निचऱ्याचा मार्ग बंद झाल्याने आगामी पावसाळ्यात शाळेच्या पटांगणात पाणी साचण्याची भीती व्यक्त होत आहे. यामुळे सुमारे २ हजार विद्यार्थ्यांच्या आरोग्याचा प्रश्न निर्माण झाला आहे.

या प्रकरणाची दखल घेत दत्ताजीराव खानविलकर एज्युकेशन ट्रस्टने १६ फेब्रुवारी २०२६ रोजी रायगड जिल्हाधिकाऱ्यांकडे लेखी तक्रार केली होती. मात्र, अद्याप कोणतीही ठोस कारवाई न झाल्याने ट्रस्टने वकिलामार्फत महाराष्ट्र राज्य रस्ते औद्योगिक विकास महामंडळ (एमएसआयडीसी)च्या कार्यकारी अभियंत्यांना दोन महिन्यांच्या आत समस्या सोडवण्याची कायदेशीर नोटीस बजावली आहे, अशी माहिती ट्रस्टचे अध्यक्ष अमर वार्डे यांनी दिली.

विद्यालय परिसरात पूर्वी पावसाच्या पाण्याचा निचरा करण्यासाठी सिमेंट पाइपची व्यवस्था होती. परंतु सध्या सुरू असलेल्या कामामुळे शाळेच्या उत्तर बाजूस मोठ्या प्रमाणावर खोदकाम करण्यात आले असून, त्यामुळे पाण्याचा नैसर्गिक प्रवाह पूर्णपणे बंद झाल्याचा आरोप ट्रस्टने केला आहे. परिणामी, पावसाळ्यात शाळेचे मैदान दलदलीत रूपांतरित होण्याची शक्यता आहे.

या विद्यालयात सुमारे २ हजार विद्यार्थी शिक्षण घेत असून, परिसरात पाणी साचल्यास डासांची उत्पत्ती वाढून रोगराई पसरण्याचा धोका आहे. तसेच, सुरू असलेल्या कामामुळे वाहतूक कोंडी वाढली असून शालेय बस व विद्यार्थ्यांच्या ये-जा करण्यास अडथळे निर्माण होत आहेत. परीक्षेच्या काळात विद्यार्थ्यांच्या वेळापत्रकावरही त्याचा परिणाम होत असल्याची तक्रार करण्यात आली आहे.

दरम्यान, या प्रकरणी यापूर्वी सार्वजनिक बांधकाम विभाग, तहसीलदार आणि ग्रामपंचायत चेंढरे यांच्याकडे पाठपुरावा करण्यात आला होता. प्रतिसाद न मिळाल्याने अलिबाग दिवाणी न्यायालयात मुकदमा क्रमांक १७९/२०२५ दाखल करण्यात आला आहे. आता दोन महिन्यांत नैसर्गिक पाण्याचा मार्ग मोकळा न केल्यास एमएसआयडीसीला देखील प्रतिवादी करण्यात येईल, असा इशारा ट्रस्टकडून देण्यात आला आहे.

-------------------------

हिंदुस्थान समाचार / संदेश साळुंके (रायगड)