नवी दिल्ली, 26 मार्च (हिं.स.) आयपीएल २०२६ च्या आधी पॅट कमिन्सबाबत एक महत्त्वपूर्ण बातमी समोर आली आहे. हा ऑस्ट्रेलियन अष्टपैलू क्रिकेटपटू पाठीच्या दुखापतीतून सावरत असून, तो स्पर्धेतील सुरुवातीचे सामने खेळू शकणार नाही. मात्र, सर्व काही सुरळीत पार पडल्यास आपण आयपीएलच्या दुसऱ्या टप्प्यात आणि प्लेऑफमध्ये पुनरागमन करू शकू, अशी आशा त्याने व्यक्त केली आहे.

पॅट कमिन्स पाठीच्या दुखण्याने त्रस्त आहे. ॲशेस मालिकेत केवळ एक कसोटी सामना खेळल्यानंतर, तो २०२६ मध्ये एकही सामना खेळलेला नाही. तो २०२६ च्या टी-२० विश्वचषकासाठी श्रीलंकेलाही गेला नव्हता. आयपीएल सुरू होण्यापूर्वी, कमिन्सने सांगितले होते की तो स्पर्धेच्या दुसऱ्या टप्प्यात आणि अंतिम सामन्यात नक्कीच खेळेल. त्याने सांगितले, मी अजूनही माझ्या पाठीच्या दुखापतीतून सावरत आहे, पण मला बरे वाटत आहे. मी नेटमध्ये गोलंदाजी करत आहे. आयपीएल लवकरच सुरू होणार आहे. मी सुरुवातीला खेळू शकणार नाही, पण जास्त वेळ लागणार नाही. सध्या मी दर तिसऱ्या दिवशी गोलंदाजी करत आहे. स्पर्धेच्या मध्यापर्यंत पूर्णपणे तंदुरुस्त होण्याची आम्ही योजना आखली आहे. आशा आहे की, काही अडचण न आल्यास, मी स्पर्धेच्या दुसऱ्या टप्प्यात आणि अंतिम सामन्यात खेळू शकेन.

कमिन्सच्या अनुपस्थितीत, सनरायझर्सने ऑरेंज आर्मीची सूत्रे इशान किशनकडे सोपवली आहेत. इशानने २०१६ मध्ये गुजरात लायन्सकडून आयपीएलमध्ये पदार्पण केले होते. आता, तो पहिल्यांदाच आयपीएल संघाचे कर्णधारपद भूषवणार आहे. तो २०१८ ते २०२४ पर्यंत मुंबई इंडियन्स संघाचा भाग होता. इशानने २०२५-२६ च्या सय्यद मुश्ताक अली ट्रॉफीमध्ये झारखंडचे नेतृत्व करत संघाला विजेतेपद मिळवून दिले होते. यामुळे त्याला २०२६ च्या विश्वचषक संघात स्थान मिळाले. आता, तो आयपीएलमध्येही त्याच यशाची पुनरावृत्ती करण्याचा प्रयत्न करेल. या स्पर्धेत ईशानला अभिषेक शर्माची साथ मिळेल. अभिषेक २०१९ पासून एसआरएच (SRH) सोबत आहे आणि त्याने भारताच्या २०२६ च्या टी-२० विश्वचषक विजयात महत्त्वाची भूमिका बजावली होती.

सनरायझर्स हैदराबाद आपला पहिला सामना २८ मार्च रोजी रॉयल चॅलेंजर्स बंगळूरविरुद्ध खेळेल. हा हंगामातील सलामीचा सामना असेल. २ एप्रिल रोजी त्यांचा सामना कोलकाता नाईट रायडर्सशी होईल. त्यांचा पहिला घरचा सामना ५ एप्रिल रोजी लखनौ सुपर जायंट्सविरुद्ध होईल. त्यानंतर ११ एप्रिल रोजी पंजाब किंग्सविरुद्ध सामना होईल.

---------------

हिंदुस्थान समाचार / वृषाली देशपांडे