गोरखपूर, 27 मार्च, (हिं.स.)। २०२६ च्या आशियाई खेळांची तयारी अधिक मजबूत करण्यासाठी, भारतीय महिला रोइंग संघाच्या राष्ट्रीय प्रशिक्षण शिबिराला शुक्रवारी गोरखपूरमध्ये सुरुवात झाली. हे शिबिर रामगढ ताल येथील वॉटर स्पोर्ट्स कॉम्प्लेक्समध्ये आयोजित करण्यात आले आहे.

भारतीय रोइंग फेडरेशनच्या विनंतीनुसार भारतीय क्रीडा प्राधिकरण (SAI) द्वारे या शिबिराचे आयोजन करण्यात आले आहे. १९ सप्टेंबर ते ४ ऑक्टोबर दरम्यान जपानमधील आयची-नागोया येथे होणाऱ्या आशियाई खेळांसाठी खेळाडूंना तयार करणे हा याचा उद्देश आहे.

भारतीय रोइंग फेडरेशनचे उपाध्यक्ष आणि उत्तर प्रदेश रोइंग असोसिएशनचे सचिव सुधीर शर्मा यांनी सांगितले की, निवडलेले खेळाडू आणि प्रशिक्षक गोरखपूरमध्ये दाखल झाले असून प्रशिक्षणाला सुरुवात झाली आहे. रोइंग स्पर्धा २० ते २५ सप्टेंबर दरम्यान गिफू प्रांतातील कैझू शहरातील नागरागावा आंतरराष्ट्रीय रेगाटा कोर्सवर आयोजित केल्या जातील.

त्यांनी सांगितले की, हे ५१ दिवसांचे प्रशिक्षण शिबिर उत्तर प्रदेशात प्रथमच आयोजित केले जात आहे. खेळाडू सिंगल स्कल्स, डबल स्कल्स, पेअर्स आणि फोर्स यांसारख्या विविध प्रकारांमध्ये सराव करतील.

दरम्यान, पुरुष रोइंग संघाचे राष्ट्रीय शिबिर पुण्यातील आर्मी नोड येथे आधीच सुरू झाले आहे.

अधिकाऱ्यांच्या मते, रामगड तलाव आंतरराष्ट्रीय मानकांनुसार विकसित करण्यात आला आहे. येथील शांत पाण्यामुळे खेळाडूंना त्यांचे तंत्र सुधारण्यास आणि कामगिरी सुधारण्यास मदत होईल.

निवडलेले खेळाडू:

किरण (हरियाणा), मृण्मयी साळगावकर (महाराष्ट्र), रुक्मिणी, विंध्या शंकर (मध्य प्रदेश), बी. आनंदी, किरण देवी (अखिल भारतीय पोलीस नियंत्रण मंडळ/मेघालय), अश्विनी कुमारन, सानिया कृष्णन, अण्णा हेलन, हीमा टी., एंजल मेरी (केरळ), मोनिका बडोरिया, आणि अंशिका भारती (ओडिसा).

प्रशिक्षक:

राजेश कुमार (सेवा क्रीडा नियंत्रण मंडळ), ममता जेना (अखिल भारतीय पोलीस नियंत्रण मंडळ).

---------------

हिंदुस्थान समाचार / हर्षदा गावकर