मुंबई, 28 मार्च (हिं.स.)। भारतातील प्रसिद्ध दुचाकी निर्माता रॉयल एनफील्ड ने आपल्या नवीन गुरिल्ला 450 (गुरिल्ला 450) च्या 2026 मॉडेलला अधिकृतपणे बाजारात सादर केले आहे. या नव्या अपडेटमध्ये कंपनीने बाइकच्या व्हेरिएंट लाइनअपमध्ये महत्त्वाचे बदल करत ग्राहकांसाठी अधिक आकर्षक पर्याय उपलब्ध करून दिले आहेत. विशेष म्हणजे या मॉडेलची सुरुवातीची किंमत आता 2.49 लाख रुपये (एक्स-शोरूम) ठेवण्यात आली आहे.
या नव्या अपडेटमधील सर्वात मोठा बदल म्हणजे नवीन एपेक्स ट्रिम (Apex Trim) चा समावेश. कंपनीने हा ट्रिम विशेषतः रोड-फोकस्ड म्हणजेच रस्त्यावर अधिक चांगला परफॉर्मन्स देण्यासाठी तयार केला आहे. या ट्रिममध्ये 17-इंचचे रोड-बायस्ड टायर्स देण्यात आले आहेत, ज्यामुळे बाइकची ग्रिप आणि स्थिरता अधिक सुधारली आहे. तसेच, रायडिंग अधिक स्पोर्टी आणि कंट्रोल्ड व्हावी यासाठी हँडलबारची रचना बदलण्यात आली आहे. हा नवीन एल्युमिनियम हँडलबार आधीपेक्षा 55 मिमी खाली आणि 57 मिमी पुढे ठेवण्यात आला आहे, त्यामुळे रायडिंग पोझिशन अधिक ‘कमिटेड’ म्हणजे झुकलेल्या प्रकारची झाली आहे.
डिझाइनच्या बाबतीतही या नवीन ट्रिममध्ये काही वेगळेपण दिसून येते. हेडलाइट काऊल आणि रिअर सीट काऊल हे बाइकच्या रंगाशी जुळवून तयार करण्यात आले आहेत, ज्यामुळे संपूर्ण लूक अधिक आकर्षक आणि प्रीमियम वाटतो. ही बाइक रेड-ब्लॅक, मॅट ब्लॅक (ग्रे आणि रेड हायलाइट्ससह) आणि ग्रीन अशा तीन रंगांमध्ये उपलब्ध आहे. यापैकी एपेक्स बेस रेड-ब्लॅक व्हेरिएंटची किंमत 2.49 लाख रुपये आहे, तर इतर रंग पर्यायांसाठी 2.56 लाख रुपये मोजावे लागतील. तर डॅश व्हेरिएंटची किंमत २.४९ लाख रुपये ते २.६७ लाख रुपये आहे आणि फ्लॅश व्हेरिएंटसाठी रु. २.७२ लाख रुपये मोजावे लागतील.
याशिवाय, कंपनीने डॅश ट्रिम (Dash Trim) आणि फ्लॅश ट्रिम (Flash Trim) या विद्यमान व्हेरिएंट्समध्येही अपडेट्स केले आहेत. या व्हेरिएंट्समध्ये आता नवीन CEAT Grip XL टायर्स देण्यात आले असून, हे टायर्स ड्राय ग्रिपमध्ये 8 टक्के आणि वेट ग्रिपमध्ये 17 टक्के सुधारणा देतात असा दावा कंपनीने केला आहे. डॅश ट्रिम आता नव्या ब्लू रंगातही उपलब्ध आहे, तर फ्लॅश ट्रिम ब्रावा ब्लू फिनिशमध्ये येतो.
फीचर्सच्या बाबतीतही या बाइकमध्ये आधुनिक तंत्रज्ञानाचा वापर करण्यात आला आहे. आता सर्व व्हेरिएंट्समध्ये 4-इंच गोल TFT डिस्प्ले देण्यात आला आहे, ज्यामध्ये गुगल मॅप्स आधारित नेव्हिगेशन सिस्टम उपलब्ध आहे. तसेच, ABS सिस्टमला नवीन टायर्सनुसार रीकॅलिब्रेट करण्यात आले आहे, ज्यामुळे ब्रेकिंग अधिक सुरक्षित होते. बाइकमध्ये स्ट्रीट (Street) आणि स्पोर्ट (Sport) असे दोन रायडिंग मोड्स कायम ठेवण्यात आले आहेत, मात्र त्यांचा प्रतिसाद अधिक सुधारण्यात आला आहे.
इंजिनबाबत बोलायचे झाल्यास, 2026 गुरिल्ला 450 मध्ये कोणताही बदल करण्यात आलेला नाही. यात पूर्वीप्रमाणेच 452cc लिक्विड-कूल्ड शेर्पा (Sherpa) इंजिन देण्यात आले आहे, जे 40 bhp पॉवर आणि 40 Nm टॉर्क निर्माण करते. हे इंजिन 6-स्पीड गिअरबॉक्ससह जोडलेले आहे, ज्यामुळे बाइकची परफॉर्मन्स आणि स्मूथ रायडिंग अनुभव कायम राहतो.
---------------
हिंदुस्थान समाचार / Suraj Chaugule
