नवी दिल्ली , 31 मार्च (हिं.स.)।पंतप्रधान नरेंद्र मोदी यांनी सोमवारी नेदरलँड्सचे पंतप्रधान रॉब जेटन यांच्याशी दूरध्वनीवरून संवाद साधत पश्चिम आशियातील सध्याच्या परिस्थितीवर सखोल चर्चा केली. दोन्ही नेत्यांनी या प्रदेशात शक्य तितक्या लवकर शांतता आणि स्थैर्य प्रस्थापित करण्याच्या गरजेवर भर दिला.

पंतप्रधान मोदी यांनी सोशल मीडिया प्लॅटफॉर्म ‘एक्स’वर माहिती देताना सांगितले की, ही चर्चा भारत-नेदरलँड्स संबंध अधिक मजबूत करण्याच्या दृष्टीने महत्त्वाची ठरली. यावेळी दोन्ही देशांमधील रणनीतिक भागीदारी पुढे नेण्याच्या विविध मुद्द्यांवर विचारविनिमय करण्यात आला.

या संवादादरम्यान सेमीकंडक्टर, मेगा जलप्रकल्प, ग्रीन हायड्रोजन आणि टॅलेंट मोबिलिटी यांसारख्या महत्त्वाच्या क्षेत्रांमध्ये सहकार्य वाढवण्याच्या शक्यतांवर विशेष भर देण्यात आला. यावरून भारत आणि नेदरलँड्स आगामी काळात तंत्रज्ञान आणि शाश्वत विकासाच्या क्षेत्रात भागीदारीला नवे आयाम देण्याच्या तयारीत असल्याचे संकेत मिळतात.

दोन्ही नेत्यांनी पश्चिम आशियातील सुरू असलेल्या तणावपूर्ण परिस्थितीवर आपापले विचार मांडले आणि या प्रदेशात शांतता प्रस्थापित होणे जागतिक स्थैर्यासाठी अत्यंत आवश्यक असल्याचे मत व्यक्त केले.पश्चिम आशियातील संकट सुरू झाल्यापासून पंतप्रधान मोदी यांनी अनेक जागतिक नेत्यांशी संवाद साधला आहे. यामध्ये सौदी अरेबिया, संयुक्त अरब अमिराती, कतार, बहरीन, कुवैत, जॉर्डन, इराण, फ्रान्स, इस्रायल आणि मलेशिया या देशांचा समावेश आहे.

---------------

हिंदुस्थान समाचार / Priyanka Bansode