तेहरान , 04 मार्च (हिं.स.)।इराणमध्ये मोजतबा खामेनेई यांची नवीन सर्वोच्च नेता म्हणून निवड झाल्याच्या बातम्या समोर आल्यानंतर इस्रायलच्या संरक्षण मंत्र्यांनी धमकीवजा इशारा दिला आहे. त्यांनी स्पष्टपणे म्हटले की, जो कोणी नवीन सर्वोच्च नेता म्हणून निवडला जाईल, त्याला संपवले जाईल. दरम्यान, इराणी सरकारने अयातुल्ला अली खामेनेई यांचे पुत्र मोजतबा खामेनेई यांना उत्तराधिकारी बनवल्याच्या बातम्यांना नकार दिला आहे.

इस्रायलचे संरक्षणमंत्री इस्रायल काट्झ यांनी सोशल मीडिया प्लॅटफॉर्म एक्स वर पोस्ट करत म्हटले की, इराण ज्यालाही पुढचा सर्वोच्च नेता म्हणून निवडेल, तो ‘निशाण्यावर’ असेल. या विधानापूर्वी काही परदेशी माध्यमांनी मोजतबा खामेनेई यांची सर्वोच्च नेता म्हणून निवड झाल्याचा दावा केला होता. मात्र, भारतातील इराणी वाणिज्य दूतावासाने या बातम्या फेटाळून लावत सांगितले की उत्तराधिकाऱ्याबाबत सुरू असलेल्या चर्चांना कोणताही अधिकृत आधार नाही. एक्स वरील एका पोस्टमध्ये दूतावासाने म्हटले की, “इराणच्या तज्ञांच्या सभेने नेतृत्वासाठी निवडलेल्या संभाव्य उमेदवारांबाबत माध्यमांमध्ये प्रसारित होत असलेल्या बातम्यांना कोणताही अधिकृत स्रोत नाही आणि त्या अधिकृतपणे नाकारण्यात येतात.”

यापूर्वी इस्रायली माध्यमांनी अयातुल्ला खामेनेई यांचे पुत्र मोजतबा खामेनेई यांची उत्तराधिकारी म्हणून निवड झाल्याची आणि ते सर्वोच्च नेता पदाची सूत्रे हाती घेणार असल्याची बातमी दिली होती. वरिष्ठ अधिकाऱ्यांनी इस्रायली माध्यमांना सांगितले होते की, येत्या काही तासांत सभेद्वारे मोजतबा खामेनेई यांना उत्तराधिकारी घोषित केले जाण्याची शक्यता आहे. मात्र, या घडामोडीबाबत इराणच्या अधिकृत सरकारी माध्यमांकडून स्वतंत्र पुष्टी मिळालेली नाही.

दरम्यान, इराणचे परराष्ट्रमंत्री सैयद अब्बास अराघची यांनी पुन्हा एकदा अमेरिकेचे राष्ट्राध्यक्ष डोनाल्ड ट्रम्प यांच्यावर निशाणा साधत युद्धासाठी त्यांना जबाबदार ठरवले. त्यांनी एक्स वरील पोस्टमध्ये लिहिले, “जेव्हा गुंतागुंतीच्या अणुचर्चांना रिअल इस्टेट व्यवहारासारखे हाताळले जाते आणि मोठमोठे खोटे सत्यावर पडदा टाकतात, तेव्हा अवास्तव अपेक्षा पूर्ण होणे अशक्य होते. परिणाम काय? राग आणि हट्टातून चर्चेच्या टेबलावरच बॉम्बहल्ले होतात. ट्रम्प यांनी केवळ कूटनीतीलाच नाही, तर त्यांना निवडून देणाऱ्या अमेरिकन नागरिकांचाही विश्वासघात केला आहे.”

---------------

हिंदुस्थान समाचार / Priyanka Bansode