-उपांत्य फेरीत दक्षिण आफ्रिकेवर 9 विकेट्सने मात- फिन ऍलनची नाबाद 100 धावांची झंझावती खेळी

कोलकाता, 04 मार्च (हिं.स.)फिन ऍलन आणि टिम सेफर्ट यांच्या स्फोटक फलंदाजीच्या जोरावर न्यूझीलंडने दक्षिण आफ्रिकेचा ९ विकेट्सने पराभव केला. यासह, किवीज संघाने टी-20 विश्वचषकाच्या अंतिम फेरीत आपले स्थान निश्चित केले आहे. न्यूझीलंडने गोलंदाजीने शानदार कामगिरी करत दक्षिण आफ्रिकेला १६९ धावांवर रोखले. त्यानंतर, न्यूझीलंडच्या सलामीच्या फलंदाजांनी शानदार फलंदाजी करत आपल्या संघाला दिमाखात अंतिम फेरी गाठून दिली.

१७० धावांच्या लक्ष्याचा पाठलाग करताना, न्यूझीलंडचे सलामीवीर टिम सेफर्ट आणि फिन ऍलन फलंदाजीला आले. या दोघांनी दक्षिण आफ्रिकेच्या गोलंदाजांवर जोरदार हल्ला चढवला आणि केवळ ९.१ षटकांत ११७ धावा करून न्यूझीलंडचा विजय निश्चित केला. सेफर्टने ३३ चेंडूंत ५८ धावा करून बाद झाला, ज्यामध्ये सात चौकार आणि दोन षटकारांचा समावेश होता. पण फिन ऍलनने आपली आक्रमक फलंदाजी सुरू ठेवली आणि ३३ चेंडूंत टी२० विश्वचषक इतिहासातील सर्वात जलद शतक झळकावले आणि न्यूझीलंडला अंतिम फेरीत प्रवेश मिळवून दिला. त्याच्या खेळीमुळे न्यूझीलंडने केवळ १२.५ षटकांत एक बाद १७३ धावा केल्या आणि नऊ विकेट्सने विजय मिळवला.

नाणेफेक गमावून प्रथम फलंदाजी करणाऱ्या दक्षिण आफ्रिकेची सुरुवात खराब झाली. दुसऱ्या षटकात त्यांनी दोन विकेट्स गमावल्या. यासह, दक्षिण आफ्रिकेचा संघ दबावाखाली आला आणि संपूर्ण डावात ते त्यातून सावरू शकले नाहीत. डावाच्या दुसऱ्या षटकात, कोल मॅककोंचीने क्विंटन डी कॉक आणि रायन रिकेल्टन यांना बाद केले. त्यानंतर कर्णधार एडेन मार्कराम ५५ धावांवर बाद झाला. दक्षिण आफ्रिकेचा निम्मा संघ ७७ धावांवर बाद झाला होता.

मार्को जॅन्सन एकटाच क्रीजवर उभा राहिला आणि त्याने किवी गोलंदाजांचा सामना केला आणि अर्धशतक झळकावले. त्याने ३० चेंडूत नाबाद ५५ धावा केल्या, ज्यामध्ये दोन चौकार आणि पाच षटकारांचा समावेश होता. दुसऱ्या क्रमांकाचा सर्वाधिक धावा करणारा फलंदाज डेवाल्ड ब्रेव्हिस होता, ज्याने ३४ धावा केल्या. किवी संघाकडून मॅट हेन्री, कोल मॅककोंची आणि रचिन रवींद्र यांनी प्रत्येकी दोन-दोन विकेट्स घेतल्या आणि दक्षिण आफ्रिकेला १६९ धावांवर रोखले.

न्यूझीलंडने दक्षिण आफ्रिकेला पराभूत करत अंतिम फेरीत प्रवेश केला. हा त्यांचा दुसरा टी२० विश्वचषक अंतिम सामना आहे. यापूर्वी, किवी संघ २०२१ च्या टी२० विश्वचषकाच्या अंतिम फेरीत पोहोचला होता, त्या अंतिम सामन्यात ऑस्ट्रेलियाकडून पराभव पत्करावा लागला होता. आता, मिचेल सँटनरच्या नेतृत्वाखालील संघ पहिल्यांदाच विश्वचषक जिंकण्याचा प्रयत्न करणार आहे.

---------------

हिंदुस्थान समाचार / वृषाली देशपांडे