तेहरान, 04 मार्च (हिं.स.)।अमेरिका-इस्रायल आणि इराण यांच्यातील संघर्ष पाचव्या दिवसात प्रवेशले आहे. दरम्यान, बुधवारी सकाळी तेहरानमध्ये स्फोटांचे आवाज ऐकू आले. इराणच्या सरकारी टीव्हीनुसार, सकाळच्या वेळी तेहरान परिसरात अनेक स्फोट झाले. दुसरीकडे, इस्रायलने सांगितले की इराणकडून डागण्यात आलेल्या क्षेपणास्त्रांमुळे त्यांना आपली एअर डिफेन्स प्रणाली सक्रिय करावी लागली. अमेरिकेचे राष्ट्राध्यक्ष डोनाल्ड ट्रम्प यांनी संकेत दिले की हे युद्ध अनेक आठवडे किंवा त्याहून अधिक काळ सुरू राहू शकते. या संघर्षात आतापर्यंत इराणमध्ये सुमारे 800 जणांचा मृत्यू झाल्याची माहिती आहे.

इस्रायलने म्हटले की हिजबुल्लाह दहशतवाद्यांविरोधात प्रत्युत्तरात्मक कारवाई करत लेबनॉनमधील अनेक ठिकाणांवर हल्ले करण्यात आले. लेबनॉनच्या सरकारी माध्यमांनुसार, बालबेक शहरातील एका निवासी इमारतीवर झालेल्या इस्रायली हल्ल्यात किमान 4 जणांचा मृत्यू झाला. यापूर्वी इस्रायलने इराणच्या मिसाइल लॉन्चर्स आणि एका अणु संशोधन केंद्रावर हवाई हल्ले केले होते. त्याला प्रत्युत्तर म्हणून इराणने इस्रायल, अमेरिकन दूतावास तसेच गल्फमधील इतर भागांना लक्ष्य केले, ज्यामुळे ऊर्जा पुरवठा आणि हवाई वाहतुकीवर परिणाम होत आहे.

दरम्यान, सौदी अरेबियातील अमेरिकन दूतावास आणि यूएईमधील अमेरिकन वाणिज्य दूतावासावरही इराणकडून ड्रोन हल्ले करण्यात आले. इराणने इस्रायलवर डझनभर बॅलिस्टिक क्षेपणास्त्रे डागली, मात्र त्यापैकी बहुतांश हवेतच निष्प्रभ करण्यात आली. दुसरीकडे, अमेरिकेच्या संरक्षण विभाग ‘पेंटागन’ने कुवैतमधील कमांड सेंटरवर रविवारी झालेल्या ड्रोन हल्ल्यात मृत्यू झालेल्या अमेरिकन आर्मी रिझर्व्हच्या चार जवानांची ओळख जाहीर केली आहे. इस्रायल-अमेरिका आघाडी आणि इराण यांच्यातील युद्धाशी संबंधित घडामोडींवर जगभराचे लक्ष लागले आहे.

कतारच्या संरक्षण मंत्रालयाने बुधवारी सांगितले की इराणने 10 ड्रोन आणि 2 क्षेपणास्त्रांद्वारे हल्ला केला, मात्र त्यांच्या सैन्याने सर्व ड्रोन आणि क्षेपणास्त्रे पाडली. यूएईच्या एअर डिफेन्सने इराणच्या 3 बॅलिस्टिक क्षेपणास्त्रांसह 129 ड्रोन रोखण्यात यश मिळवले. संरक्षण मंत्रालयाने जाहीर केले की 4 मार्च 2026 रोजी यूएई एअर डिफेन्सने 3 बॅलिस्टिक क्षेपणास्त्रे यशस्वीरित्या इंटरसेप्ट केली तसेच 129 ड्रोनचा शोध घेतला, त्यापैकी 121 ड्रोन हवेतच नष्ट करण्यात आले, तर 8 ड्रोन देशाच्या भूभागात कोसळले.

दरम्यान, इस्रायली सैन्याने दावा केला की बुधवारी त्यांच्या एफ-35 स्टेल्थ फायटर जेटने तेहरानच्या आकाशात इराणचे याक-130 लढाऊ विमान पाडले. त्या वेळी विमानात इराणी वैमानिक उपस्थित होता. इस्रायलने याला त्यांच्या लढाऊ विमानाने वैमानिकासह इराणी विमानाला हवेतून हवेत मार गिरवण्याची पहिली घटना असल्याचे म्हटले आहे.

---------------

हिंदुस्थान समाचार / Priyanka Bansode