मुंबई, 01 एप्रिल (हिं.स.)। भारतातील स्मार्टफोन बाजारात स्वदेशी कंपनी लावाने आपला नवीन बजेट स्मार्टफोन “लावा बोल्ड एन2 प्रो” लॉन्च केला आहे. अत्यंत परवडणाऱ्या किंमतीत, म्हणजेच 8 हजार रुपयांपेक्षाही कमी दरात उपलब्ध होणारा हा फोन दमदार फीचर्ससह ग्राहकांसमोर आणण्यात आला आहे. कंपनीने दिलेल्या माहितीनुसार, लावा बोल्ड एन२ प्रो ची किंमत ७,९९९ रुपये आहे. या फोनमध्ये 5000mAh बॅटरी, 50 मेगापिक्सेल कॅमेरा आणि स्मूथ परफॉर्मन्ससाठी सक्षम प्रोसेसर देण्यात आला आहे, त्यामुळे बजेट सेगमेंटमध्ये हा फोन चांगली स्पर्धा निर्माण करणार आहे.
या स्मार्टफोनमध्ये 6.75 इंचाचा एचडी प्लस एलसीडी डिस्प्ले देण्यात आला असून 120Hz रिफ्रेश रेटमुळे स्क्रोलिंग आणि गेमिंगचा अनुभव अधिक स्मूथ होतो. फोनमध्ये युनिसॉक टी7250 प्रोसेसर देण्यात आला आहे, जो दैनंदिन वापरासाठी योग्य परफॉर्मन्स देतो. यासोबत 4GB रॅम आणि अतिरिक्त 4GB व्हर्च्युअल रॅम सपोर्ट असल्यामुळे मल्टिटास्किंग अधिक सोपे होते. स्टोरेजच्या बाबतीत 64GB आणि 128GB असे पर्याय देण्यात आले असून मायक्रोएसडी कार्डच्या मदतीने 512GB पर्यंत स्टोरेज वाढवता येते.
हा फोन अँड्रॉइड 15 ऑपरेटिंग सिस्टमवर चालतो आणि कंपनीने अँड्रॉइड 16 चे एक मोठे अपडेट तसेच दोन वर्षांचे सिक्युरिटी अपडेट्स देण्याचे आश्वासन दिले आहे. कॅमेऱ्याबाबत बोलायचे झाल्यास, फोनच्या मागील बाजूस 50 मेगापिक्सेलचा एआय ट्रिपल कॅमेरा सेटअप देण्यात आला आहे, तर सेल्फीसाठी पुढील बाजूस 8 मेगापिक्सेल कॅमेरा उपलब्ध आहे.
बॅटरीच्या बाबतीत हा फोन 5000mAh क्षमतेसह येतो आणि 18W फास्ट चार्जिंग सपोर्ट देतो. कनेक्टिव्हिटीसाठी ड्युअल 4G व्होल्टे, वाय-फाय, ब्लूटूथ 5.2, जीपीएस आणि यूएसबी टाइप-सी पोर्टचा समावेश आहे. याशिवाय 3.5mm ऑडिओ जॅक, एफएम रेडिओ, ऑटो कॉल रेकॉर्डिंग आणि एनॉनिमस कॉल हँडलिंगसारखे फीचर्सही देण्यात आले आहेत.
फोनला IP54 रेटिंग देण्यात आली असून धूळ आणि पाण्याच्या शिंतोड्यांपासून संरक्षण मिळते. तसेच साइड-माउंटेड फिंगरप्रिंट स्कॅनरमुळे सुरक्षा अधिक मजबूत करण्यात आली आहे. हा स्मार्टफोन ऑरोरा गोल्ड आणि इक्लिप्स ग्रे अशा आकर्षक रंगांमध्ये उपलब्ध आहे.
“लावा बोल्ड एन2 प्रो” ची विक्री 6 एप्रिलपासून दुपारी 12 वाजता फ्लिपकार्ट वर सुरू होणार आहे. कमी किंमतीत चांगले फीचर्स देणारा हा स्मार्टफोन बजेट ग्राहकांसाठी एक उत्तम पर्याय ठरू शकतो.
---------------
हिंदुस्थान समाचार / Suraj Chaugule
