सर्वोच्च धावसंख्येचा पाठलाग करण्याचा विक्रम काढला मोडित
वेलिंग्टन, 01 एप्रिल (हिं.स.)अमेलिया केरच्या नेतृत्वाखाली, न्यूझीलंडच्या महिला संघाने दक्षिण आफ्रिकेविरुद्ध शानदार कामगिरी करत एक ऐतिहासिक विजय मिळवला. तीन सामन्यांच्या एकदिवसीय मालिकेतील दुसऱ्या सामन्यात, न्यूझीलंडने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना, दक्षिण आफ्रिकेने निर्धारित ५० षटकांत ६ गडी गमावून ३४६ धावा केल्या. प्रत्युत्तरात, न्यूझीलंडच्या महिला संघाने २ चेंडू शिल्लक असताना लक्ष्य गाठले आणि २ गडी राखून सामना जिंकला.या विजयासह, न्यूझीलंडच्या महिला संघाने इतिहास रचला. भारतीय महिला संघाचा विक्रम मोडून, महिला क्रिकेट संघाने एकदिवसीय क्रिकेटच्या इतिहासात यशस्वी धावसंख्येचा पाठलाग करण्याचा हा विक्रम ठरला.
प्रथम फलंदाजी करताना, दक्षिण आफ्रिकेच्या महिला संघाची कर्णधार लॉरा वॉल्व्हार्डने ८ चौकार आणि १ षटकाराच्या मदतीने ७४ चेंडूंमध्ये ६९ धावा केल्या. ॲन बॉशनेही ९० चेंडूंमध्ये ९१ धावांची खेळी केली. सुने लुसने ४० धावा केल्या, तर यष्टीरक्षक सिनालो जाफ्ताने ३७ धावा आणि क्लोई ट्रायनने नाबाद ५२ धावा केल्या. या खेळींमुळे न्यूझीलंडने विजयासाठी ३४७ धावांचे लक्ष्य ठेवले. किवी संघाकडून ब्रिएर्न एलिंगने तीन बळी घेतले, तर केली नाईटने दोन बळी घेतले. जेस केरनेही एक बळी घेतला.
न्यूझीलंड महिला संघाची कर्णधार अमेलिया केरने १३९ चेंडूंमध्ये २३ चौकार आणि एक षटकार मारून नाबाद १७९ धावा केल्या. तिच्या खेळीमुळे संघाला आठ गडी गमावून ३५० धावांपर्यंत पोहोचण्यास मदत झाली. किवी संघाने दोन चेंडू शिल्लक असताना हे लक्ष्य पूर्ण केले. या विजयासह, न्यूझीलंडने भारतीय महिला संघाचा विक्रम मोडून एकदिवसीय क्रिकेटच्या इतिहासातील सर्वात मोठ्या यशस्वी धावसंख्येचा पाठलाग पूर्ण केला. यापूर्वी, हरमनप्रीत कौरच्या नेतृत्वाखाली भारतीय महिला क्रिकेट संघाने गेल्या ऑक्टोबरमध्ये ऑस्ट्रेलियाविरुद्ध महिला विश्वचषक उपांत्य फेरीत ३३९ धावांचा पाठलाग केला होता.या विजयामुळे न्यूझीलंड महिला क्रिकेट संघाने तीन सामन्यांची एकदिवसीय मालिका १-१ अशी बरोबरीत आणली आहे. तिसरा आणि अंतिम एकदिवसीय सामना ४ एप्रिल रोजी होणार आहे.
---------------
हिंदुस्थान समाचार / वृषाली देशपांडे
