नाशिक, 14 एप्रिल (हिं.स.)। भोंदूगिरी व महिलांच्या शोषणाच्या आरोपांमध्ये अडकलेल्या अशोक खरातच्या अडचणी आणखी वाढल्या असून, न्यायालयाने त्याला पुन्हा १८ एप्रिलपर्यंत पाच दिवसांची पोलिस कोठडी सुनावली आहे. तिसऱ्या गुन्ह्यातील कोठडी संपल्यानंतर त्याला व्हिडिओ कॉन्फरन्सिंगद्वारे न्यायालयात हजर करण्यात आले.

सुनावणीदरम्यान सुरुवातीला तांत्रिक अडचणी निर्माण झाल्या, मात्र त्या दूर झाल्यानंतर प्रक्रिया पुन्हा सुरू झाली. न्यायाधीशांच्या प्रश्नांना उत्तर देताना खरातने पोलिसांकडून मारहाण झालेली नसल्याचे सांगितले.सरकारी वकील अॅड. शैलेंद्र बागडे यांनी आरोपी स्वतःला देवाचा अवतार सांगून महिलांना प्रभावाखाली आणत असल्याचा आरोप केला. महिलांना दिल्या जाणाऱ्या पदार्थांमध्ये गुंगी आणणारे घटक मिसळले जात असल्याचा संशय व्यक्त करण्यात आला. या माध्यमातून महिलांचे मानसिक व शारीरिक शोषण केल्याचे त्यांनी नमूद केले.तपासासाठी वापरलेले पदार्थ, तसेच भोंदूगिरीसाठी वापरलेल्या वस्तूंचा शोध घेणे आवश्यक असल्याने अधिक कोठडीची मागणी सरकारी पक्षाने केली. बचाव पक्षाने याला विरोध करत तपास पूर्ण झाल्याचा दावा केला, मात्र न्यायालयाने सरकारी पक्षाचा युक्तिवाद मान्य केला.

तपासासाठी कोठडी आवश्यक

दोन्ही बाजूंचे म्हणणे ऐकल्यानंतर न्यायालयाने पोलिसांचा युक्तिवाद ग्राह्य धरत खरातला पाच दिवसांची पोलिस कोठडी मंजूर केली. या कालावधीत तपास यंत्रणा आरोपीच्या कार्यपद्धतीबाबत अधिक माहिती मिळवण्याचा प्रयत्न करणार आहे. आतापर्यंत अनेक महिलांनी खरातविरोधात तक्रारी दाखल केल्या असून, पुढील चौकशीत आणखी धक्कादायक बाबी समोर येण्याची शक्यता व्यक्त केली जात आहे.

---------------

हिंदुस्थान समाचार / GOSAVI CHANDRASHEKHAR SUKDEV