तेहरान, 22 एप्रिल (हिं.स.)। पश्चिम आशियातील सुरू असलेल्या तणावाच्या पार्श्वभूमीवर ओमानजवळ समुद्रात एका कंटेनर जहाजावर हल्ला झाला आहे. युनायटेड किंगडम मेरीटाइम ट्रेड ऑपरेशन्स (यूकेएमटीओ) यांनी या घटनेची माहिती दिली. अहवालानुसार, इराणच्या रिव्होल्युशनरी गार्ड कॉर्प्स (आयआरजीसी) च्या एका गनबोटीने या जहाजावर हल्ला केला. हा हल्ला ओमानच्या किनाऱ्यापासून सुमारे १५ सागरी मैल उत्तर-पूर्व दिशेला झाला. जहाजाच्या कॅप्टनने सांगितले की, इराणी गनबोटीने कोणतीही पूर्वसूचना न देता अचानक गोळीबार सुरू केला.या हल्ल्यात जहाजाच्याज ब्रिजला (नियंत्रण कक्ष असलेला भाग) मोठे नुकसान झाले आहे. दिलासादायक बाब म्हणजे जहाजावर आग लागल्याची किंवा पर्यावरणीय हानी झाल्याची कोणतीही माहिती समोर आलेली नाही. जहाजावरील सर्व कर्मचारी पूर्णपणे सुरक्षित आहेत.

यूकेएमटीओने या मार्गाने जाणाऱ्या इतर जहाजांना सतर्क राहण्याचा आणि कोणतीही संशयास्पद हालचाल दिसल्यास त्वरित माहिती देण्याचा सल्ला दिला आहे. अहवालानुसार, समुद्रातील हा तणाव गेल्या काही दिवसांपासून सातत्याने वाढत आहे. २० एप्रिल रोजी इराणी सैन्याने अमेरिकन युद्धनौकांकडे ड्रोन पाठवले होते. इराणचे म्हणणे आहे की, ओमानच्या समुद्रात त्यांच्या एका व्यापारी जहाजावर हल्ला झाला होता, त्याला प्रत्युत्तर म्हणून त्यांनी हे पाऊल उचलले. दुसरीकडे, आयआरजीसीने दावा केला आहे की अमेरिकन सैन्याने त्यांच्या एका व्यापारी जहाजावर गोळीबार केला होता, मात्र इराणी प्रत्युत्तरानंतर अमेरिकन सैनिकांना माघार घ्यावी लागली. अहवालानुसार, अमेरिकन सैन्याने इराणी जहाजाला घाबरवण्यासाठी आणि ते पुन्हा इराणी सीमेकडे पाठवण्यासाठी लक्ष्य केले होते.

दरम्यान, इराणने हॉर्मुझ सामुद्रधुनी बंद करण्याचा निर्णय घेतला आहे. आयआरजीसीने म्हटले आहे की अमेरिकेने इराणी बंदरांची सागरी नाकेबंदी केली आहे. इराण याला युद्धविरामाचे उल्लंघन मानत आहे. हजरत खातम अल-अंबिया लष्करी मुख्यालयाने अमेरिकेवर सागरी दरोडेखोरीचाही आरोप केला आहे. दुसरीकडे, अमेरिकन सेंट्रल कमांड (सेंटकॉम) ने वेगळाच दावा केला आहे. त्यांच्या म्हणण्यानुसार, अमेरिकन युद्धनौका यूएसएस स्प्रुएंसने अरबी समुद्रात इराणी जहाज तूसका (टूस्का) याला अडवले होते. अमेरिकेच्या मते, या जहाजाने सागरी नाकेबंदीचे नियम मोडले होते.

सध्या या भागातील व्यापारी जहाजांची वाहतूक गंभीररीत्या प्रभावित झाली आहे. आयआरजीसीने इशारा दिला आहे की अमेरिकन सैन्याच्या या सशस्त्र दरोड्याचा बदला नक्की घेतला जाईल. युद्धविरामाची मुदत वाढवण्यात आली असली तरी दोन्ही देशांमधील परिस्थिती अजूनही गंभीरच आहे.

---------------

हिंदुस्थान समाचार / Priyanka Bansode