देहरादून, 22 एप्रिल (हिं.स.)।केदारनाथ धामाचे कपाट आज, बुधवारी सकाळी आठ वाजता शुभ मुहूर्तावर विधी-विधान आणि पूजा-अर्चना करून भाविकांसाठी खुले करण्यात आले. कपाट उघडताच मंदिर परिसर ‘हर हर महादेव’ आणि ‘जय बाबा केदार’च्या जयघोषांनी दुमदुमून गेला. हजारो भाविक या पवित्र क्षणाचे साक्षीदार ठरले. राज्याचे मुख्यमंत्री पुष्करसिंह धामी यांनी धामात पोहोचून विशेष पूजा-अर्चना केली आणि राज्यातील जनतेच्या सुख-समृद्धीसाठी प्रार्थना केली.

बाबा केदार यांच्या धामाला सुमारे ५१ क्विंटल फुलांनी भव्य सजावट करण्यात आली होती, ज्यामुळे भाविक मंत्रमुग्ध झाले. देश-विदेशातून हजारो भाविक आधीच धामात दाखल झाले होते आणि कपाट उघडण्याच्या या अद्भुत क्षणाचे साक्षीदार बनले.यापूर्वी बाबा केदार यांच्या पंचमुखी चल विग्रह उत्सव डोलीने मंगळवारी सायंकाळी साडेचार वाजता केदारनाथ धामात प्रवेश केला. ओंकारेश्वर मंदिर, उखीमठ येथून रवाना झालेली ही डोली १७ किलोमीटरची कठीण पायी यात्रा पूर्ण करत जंगलचट्टी, रामबाडा, लिनचोली आणि बेस कॅम्प मार्गे केदारपुरीत पोहोचली. धामात पोहोचताच भाविकांनी पुष्पवृष्टी करून डोलीचे भव्य स्वागत केले.

डोलीने मंदिराची प्रदक्षिणा करून भंडारगृहात प्रवेश केला, जिथे विधिवत पूजा-अर्चना पार पडली. यावेळी ८वी सिखलाई रेजिमेंटच्या बँडच्या मधुर सुरांनी आणि डमरूच्या निनादाने संपूर्ण वातावरण शिवमय झाले.

सुरक्षेचे कडक बंदोबस्त करण्यात आले होते आणि पोलीस तसेच आयटीबीपीचे जवान तैनात करण्यात आले होते. कपाट उघडताच केदारनाथ यात्रेचा विधिवत शुभारंभ झाला. देशाच्या विविध भागांतून आलेले भाविक बाबा केदार यांच्या भक्तीत तल्लीन झालेले दिसून आले.या प्रसंगी बीकेटीसी अध्यक्ष हेमंत द्विवेदी, पुजारी टी. गंगाधर लिंग, केदारसभा अध्यक्ष राजकुमार तिवारी, जिल्हाधिकारी आणि बीकेटीसी मुख्य कार्यकारी अधिकारी विशाल मिश्रा, पोलीस अधीक्षक निहारिका तोमर यांच्यासह अनेक मान्यवर आणि मोठ्या संख्येने भाविक उपस्थित होते.

---------------

हिंदुस्थान समाचार / Priyanka Bansode