कोपनहेगन, 27 एप्रिल (हिं.स.) हॉर्सेन्स येथे 'अ' गटातील लढतीत ऑस्ट्रेलियाचा ५-० असा दणदणीत पराभव करत, भारताने थॉमस कपच्या उपांत्यपूर्व फेरीत आपले स्थान निश्चित केले. या गटात भारत आणि चीन हे अव्वल स्थानांवर आहेत. २०२२ च्या विजेत्या भारताने कॅनडावर ४-१ असा विजय मिळवत आपल्या मोहिमेची सुरुवात केली होती; तर दुसरीकडे, चीनने ऑस्ट्रेलियाचा ५-० असा धुव्वा उडवला आणि दिवसाच्या सुरुवातीलाच कॅनडाचा ४-१ ने पराभव केला. गटातील अव्वल स्थान कोणाचे, हे निश्चित करण्यासाठी हे दोन्ही संघ बुधवारी आपल्या गटातील शेवटच्या लढतीत आमनेसामने येतील. पॅरिस ऑलिम्पियन आणि राष्ट्रकुल क्रीडा स्पर्धेचा विजेता लक्ष्य सेन याने, एफ्रेम स्टीफन सॅमचा २१-१४, २१-१६ असा पराभव करत भारताला सुरुवातीलाच आघाडी मिळवून दिली आणि विजयाचा पाया रचला.

यूएस ओपन विजेता आणि नुकत्याच पार पडलेल्या 'बॅडमिंटन आशिया चॅम्पियनशिप'मध्ये उपविजेता ठरलेल्या आयुष शेट्टीने, श्रेय धंदवर २१-८, २१-६ अशा एकतर्फी विजयाची नोंद करत भारताची आघाडी दुप्पट केली.आशियाई क्रीडा स्पर्धेतील सुवर्णपदक विजेती आणि भारताची अव्वल दुहेरी जोडी असलेल्या सात्विकसाईराज रंकीरेड्डी व चिराग शेट्टी यांनी, रिझकी हिदायत आणि जॅक यू यांचा २१-१४, २१-१६ असा पराभव करत भारताची आघाडी ३-० पर्यंत वाढवली आणि हा सामना आपल्या नावी केला.

२०२३ च्या जागतिक अजिंक्यपद स्पर्धा आणि आशियाई क्रीडा स्पर्धेत कांस्यपदक विजेता ठरलेल्या एच.एस. प्रणॉयने, ऋषी होंडा भूपतीचा ३० मिनिटांपेक्षाही कमी कालावधीत २१-११, २१-१७ असा पराभव करत भारताची आघाडी आणखी भक्कम केली.

दुसऱ्या दुहेरीच्या सामन्यात, हरिहरन अमसकारुणन आणि एम.आर. अर्जुन यांनी अंदिका रामदियांश्या आणि एफ्राइम स्टीफन सॅम यांचा २१-१२, २१-१० असा धुव्वा उडवला; यासह भारताने एकही सामना न गमावता, अत्यंत निर्दोष कामगिरीसह उपांत्यपूर्व फेरीत आपला प्रवेश निश्चित केला.

---------------

हिंदुस्थान समाचार / वृषाली देशपांडे