मुंबई, 28 एप्रिल (हिं.स.)आयपीएल २०२६ चा हंगाम आतापर्यंत मुंबई इंडियन्ससाठी चांगला गेलेला नाही. हार्दिक पांड्याच्या नेतृत्वाखाली संघाने आतापर्यंत पाच सामने गमावले आहेत आणि दुखापतींमुळे त्यांच्या अडचणींमध्ये भर पडली आहे. रोहित शर्मा दुखापतीमुळे मागील तीन सामन्यांमधून बाहेर पडला आहे, तर न्यूझीलंडचा शक्तिशाली फिरकी गोलंदाज अष्टपैलू मिचेल सँटनर आता संघाबाहेर झाला असून, मुंबईने त्याच्या बदली क्रिकेटपटूची घोषणा केली आहे.

मुंबई इंडियन्स फ्रँचायझीने सांगितले की, डाव्या खांद्याच्या दुखापतीमुळे मिचेल सँटनर संघाबाहेर झाला आहे. मुंबई इंडियन्सने या फिरकी गोलंदाजाला २ कोटी रुपयांना करारबद्ध केले होते. सँटनरने या हंगामात मुंबईसाठी केवळ चार सामने खेळले असून, त्यात त्याने पाच बळी घेतले आहेत आणि केवळ २६ धावा केल्या आहेत.

हंगाम मध्यंतरानंतर मुंबई इंडियन्सने आता मिचेल सँटनरच्या जागी केशव महाराजला करारबद्ध केले आहे. संघात सामील होण्यासाठी त्याला ७५ लाख रुपये देण्यात आले. केशव हा एक अनुभवी ऑफ-स्पिनर असून त्याच्या नावावर २१८ टी-२० सामने आहेत. केशवने २१८ टी-२० सामन्यांमध्ये १९१ बळी घेतले आहेत आणि आतापर्यंत आयपीएलमध्ये फक्त दोन सामने खेळून दोन बळी मिळवले आहेत.

मुंबई इंडियन्सबद्दल बोलायचे झाल्यास, त्यांचा फॉर्म आतापर्यंत खराब राहिला आहे. हार्दिक पांड्याच्या कर्णधारपदाखाली मुंबईचे फलंदाज निष्प्रभ ठरले आहेत, परिणामी मुंबईने खेळलेल्या सात सामन्यांपैकी फक्त दोन जिंकले आहेत आणि पाच गमावले आहेत. आता, जर मुंबई इंडियन्सला प्लेऑफमध्ये पोहोचायचे असेल, तर त्यांना हंगामात पुढे जाण्यासाठी त्यांच्या उर्वरित सात सामन्यांपैकी किमान सहा सामने जिंकावे लागतील. मुंबईचा पुढील सामना २९ एप्रिल रोजी हैदराबादविरुद्ध होणार आहे.

---------------

हिंदुस्थान समाचार / वृषाली देशपांडे