चंदीगड, 29 एप्रिल (हिं.स.) : राजस्थान रॉयल्सचा कर्णधार रियान पराग वादात सापडला आहे. मंगळवारी पंजाब किंग्सविरुद्धच्या सामन्यादरम्यान तो ड्रेसिंग रूममध्ये ई-सिगारेट ओढताना कॅमेऱ्यात कैद झाला. थेट प्रक्षेपणातील एक क्लिप सोशल मीडियावर व्हायरल होत आहे. हा व्हिडिओ राजस्थानच्या डावातील १६ व्या षटकातील आहे.

हा व्हिडिओ सोशल मीडियावर व्हायरल झाला असून, त्यामुळे संभाव्य शिस्तभंगाच्या कारवाईबद्दल प्रश्न निर्माण झाले आहेत. भारतीय क्रिकेट नियामक मंडळाने स्टेडियममधील क्रिकेटपटूंच्या वर्तनासाठी कठोर नियम घालून दिले आहेत. आरोग्य आणि सुरक्षा नियमांनुसार, ड्रेसिंग रूम किंवा डगआउटमध्ये धूम्रपान आणि तंबाखू किंवा संबंधित उत्पादनांच्या वापरास सामान्यतः मनाई आहे आणि केवळ निर्धारित ठिकाणीच परवानगी आहे. रियान परागवर शिक्षेचा धोका आहे. या क्लिपमुळे आणखी एक प्रश्न निर्माण झाला आहे, कारण भारतात इलेक्ट्रॉनिक सिगारेट प्रतिबंधक कायदा (PECA), २०१९ अंतर्गत ई-सिगारेट किंवा व्हेप्सवर बंदी आहे. हा कायदा त्यांच्या उत्पादन, विक्री, खरेदी आणि वापरास प्रतिबंध करतो आणि त्याचे उल्लंघन केल्यास दंड आणि तुरुंगवासाची शिक्षा होऊ शकते.

सध्या, आयपीएलकडून या क्लिपबद्दल किंवा कोणत्याही संभाव्य आचारसंहिता उल्लंघनाबद्दल कोणतीही अधिकृत पुष्टी आलेली नाही. पण, या घटनेमुळे संभाव्य शिस्तभंगाच्या कारवाईबद्दल चर्चा सुरू झाली आहे. आयपीएलने यापूर्वी ड्रेसिंग रूम आणि टीमच्या परिसरातील वर्तनाबाबत कठोर भूमिका घेतली आहे. या हंगामात, राजस्थान रॉयल्सचे संघ व्यवस्थापक रोमी भिंदर यांना सामन्यादरम्यान डगआऊटमध्ये फोन वापरल्याबद्दल १ लाख रुपयांचा दंड ठोठावण्यात आला. त्यांना अधिकृत ताकीदही देण्यात आली.

क्रिकेटपटूंचे मैदानाबाहेरील अनेक व्हायरल व्हिडिओ समोर आले आहेत, ज्यात कागिसो रबाडाच्या एका व्हिडिओने सोशल मीडियावर लक्ष वेधून घेतले आहे. प्रत्येक प्रकरण वेगळे असले तरी, नियमांचे उल्लंघन आढळल्यास लीगने सातत्याने कारवाई केली आहे. जर रियान परागचा व्हिडिओ आयपीएल आचारसंहितेचे उल्लंघन असल्याचे मानले गेले, तर त्याला दंड किंवा इतर शिस्तभंगाच्या कारवाईला सामोरे जावे लागू शकते. लीग हे प्रकरण अधिकृतपणे हाती घेते की नाही याकडे सर्वांचे लक्ष लागले आहे.

---------------

हिंदुस्थान समाचार / वृषाली देशपांडे