सायप्रस, ८ एप्रिल (हिं.स.)। भारताच्या दिव्या देशमुखने फिडे कॅन्डिडेट्स टूर्नामेंट २०२६ च्या आठव्या फेरीत आघाडीवर असलेल्या ॲना मुझीचुकला पराभूत करत शानदार कामगिरी केली आणि संयुक्त आघाडी घेतली. आपल्या पहिल्याच कॅन्डिडेट्स टूर्नामेंटमध्ये खेळणाऱ्या दिव्यावर सुरुवातीला दडपण आले, पण तिने एंडगेममध्ये जोरदार पुनरागमन करत सामना जिंकला. या विजयामुळे ती मुझीचुक, आर. वैशाली, झू जिनर आणि कॅटरिना लॅग्नो यांच्यासोबत संयुक्त आघाडीवर पोहोचली आहे.

मिडलगेम आणि सुरुवातीच्या एंडगेममध्ये मुझीचुकचे नियंत्रण होते आणि सामना बरोबरीत सुटेल असे वाटत होते. तथापि, ७६ व्या चालीनंतर दिव्याने आपल्या प्रतिस्पर्धीच्या राजाला वारंवार शह दिला, ज्यामुळे ती असुरक्षित झाली. ८० व्या चालीवर मुझीचुकने केलेली चूक महागात पडली आणि दिव्याने निर्णायक हल्ला चढवून विजय मिळवला.महिलांच्या इतर सामन्यांमध्ये, वैशालीने बिबिसारा असाउबायेवाविरुद्ध सामना बरोबरीत सोडवला, तर लाग्नोने अलेक्झांड्रा गोर्याचकिनाला पराभूत केले. झू जिनरने टॅन झोंगयीवर विजय मिळवला.खुल्या गटात, अव्वल मानांकित झवोखिर सिंदारोव्ह आणि आंद्रे एसिपेन्को यांच्यातील सामना बरोबरीत सुटला. दोन्ही खेळाडूंनी मधल्या टप्प्यात संतुलित खेळ दाखवला आणि अखेरीस सामना बरोबरीत संपला.

भारताचा आर. प्रज्ञानानंद अनिश गिरीकडून पराभूत झाला. गिरीने 36.e6 या महत्त्वपूर्ण चालीने दबाव आणल्यामुळे प्रज्ञानानंदला अखेरीस हार मानावी लागली. इतर सामन्यांमध्ये, हिकारू नाकामुराने फॅबियानो कारुआनाला पराभूत करून स्पर्धेतील आपला पहिला विजय नोंदवला, तर वेई यी आणि मॅथियास ब्लुबाम यांच्यातील सामना बरोबरीत सुटला.

---------------

हिंदुस्थान समाचार / वृषाली देशपांडे