वॉशिंग्टन , 08 एप्रिल (हिं.स.)।अमेरिकेचे राष्ट्राध्यक्ष डोनाल्ड ट्रम्प यांनी इराणविषयी मोठी घोषणा केली आहे. ट्रम्प यांनी स्पष्ट इशारा देत म्हटले आहे की, जो कोणताही देश इराणला लष्करी शस्त्रे किंवा युद्धसामग्री पुरवठा करेल, त्याला मोठे आर्थिक नुकसान सहन करावे लागेल. अशा देशांकडून अमेरिकेत आयात होणाऱ्या सर्व वस्तूंवर तात्काळ प्रभावाने ५० टक्के आयात शुल्क (टॅरिफ) लावण्यात येणार असल्याची घोषणा त्यांनी केली. या निर्णयात कोणत्याही देशाला सूट किंवा सवलत दिली जाणार नाही, असेही राष्ट्राध्यक्षांनी ठामपणे सांगितले.

ट्रम्प यांनी धक्कादायक दावा करत म्हटले की, इराणमध्ये ‘सत्तांतर’ झाले असून नव्या व्यवस्थेनुसार तेथे युरेनियम संवर्धन पूर्णपणे बंद करण्यात येणार आहे. त्यांनी सांगितले की, अमेरिका इराणसोबत मिळून काम करणार असून जमिनीखाली दबलेला अणु अवशेष बाहेर काढून नष्ट केला जाईल. तसेच, इराणमधील संवेदनशील ठिकाणांवर अमेरिकेची ‘स्पेस फोर्स’ उपग्रहांच्या माध्यमातून बारकाईने नजर ठेवून असल्याचा दावा त्यांनी केला. अलीकडील हल्ल्यांनंतर त्या ठिकाणांना कोणी स्पर्शही केलेला नाही, असेही त्यांनी नमूद केले.

युद्धानंतर शांततेच्या दिशेने पावले उचलताना अमेरिका आणि इराण यांच्यात निर्बंधांमध्ये सवलत देण्याबाबत चर्चा सुरू असल्याचे ट्रम्प यांनी सांगितले. दोन्ही देशांदरम्यान १५ सूत्रीय अजेंडा तयार करण्यात आला असून त्यातील अनेक मुद्द्यांवर सहमती झाल्याचा खुलासाही त्यांनी केला. इराणविरोधातील ट्रम्प यांची ही भूमिका पाहता, ते तेहरानला आर्थिकदृष्ट्या जगापासून अलग ठेवण्याचा प्रयत्न करत असल्याचे दिसून येते, जेणेकरून कोणतीही बाह्य शक्ती इराणला लष्करी मदत करू शकणार नाही. त्याचवेळी अण्वस्त्रांचा धोका पूर्णपणे संपवण्याच्या योजनेवरही ते काम करत असल्याचे संकेत मिळत आहेत.

तज्ज्ञांच्या मते, ट्रम्प यांच्या ५० टक्के टॅरिफच्या निर्णयामुळे जागतिक व्यापारात मोठी खळबळ उडू शकते. चीन आणि रशिया हे इराणचे निकटवर्ती देश मानले जात असल्याने, त्यांच्यासाठी अमेरिकेसोबत व्यापार करणे अधिक आव्हानात्मक ठरू शकते. मात्र, अमेरिकेने नेमक्या कोणत्या देशांवर हा ५० टक्के टॅरिफ लागू केला जाणार आहे, याबाबत अद्याप स्पष्ट माहिती समोर आलेली नाही.

---------------

हिंदुस्थान समाचार / Priyanka Bansode