जेरुसलेम, 09 एप्रिल (हिं.स.)।इस्त्रायलने बुधवारी रात्री संपूर्ण लेबनानमध्ये जोरदार हवाई हल्ल्यांची मालिका सुरू केली. माहितीनुसार, इस्त्रायलने अवघ्या १० मिनिटांत १०० हून अधिक ठिकाणांवर हल्ले केले. हे हल्ले हिजबुल्लाहचे कमांड सेंटर आणि लष्करी तळ असल्याचा दावा इस्त्रायलने केला आहे. या हल्ल्यांमध्ये २५० हून अधिक लोकांचा मृत्यू झाल्याची पुष्टी झाली आहे.

दरम्यान, अधिकाऱ्यांचे म्हणणे आहे की इराणमध्ये युद्धविराम (सीजफायर) लागू असतानाही लेबनानमधील सशस्त्र गट हिजबुल्लाहविरोधातील युद्ध सुरूच आहे. इस्त्रायलने या हवाई कारवाईला आतापर्यंतचा सर्वात मोठा हल्ला असल्याचे म्हटले आहे. बेरूतच्या दक्षिणेकडील उपनगरांपासून दक्षिण लेबनान आणि पूर्वेकडील बेका खोऱ्यातील अनेक भागांना लक्ष्य करण्यात आले.

लेबनानच्या आरोग्य मंत्रालयाने दिलेल्या माहितीनुसार, किमान २ जणांचा मृत्यू झाला असून ही संख्या वाढण्याची शक्यता आहे. तसेच ८९० हून अधिक लोक जखमी झाले आहेत. बेरूतमध्ये झालेल्या या मोठ्या हवाई हल्ल्यानंतर अनेक तास उलटल्यानंतरही आपत्कालीन बचाव पथके ढिगाऱ्याखाली अडकलेल्या लोकांचा शोध घेत होती. आरोग्य मंत्रालयाच्या मते, या युद्धामुळे अनेकांचे जीव अजूनही मलब्याखाली अडकले असल्याची भीती आहे. आतापर्यंत या संघर्षात एकूण १,७०० हून अधिक लोकांचा मृत्यू झाला असून त्यामध्ये किमान १३० मुलांचा समावेश आहे. दुसरीकडे, इस्त्रायलचा दावा आहे की त्यांनी हिजबुल्लाहचे सुमारे १,१०० लढवय्ये ठार केले आहेत.

हे हल्ले अशा वेळी झाले, जेव्हा इस्त्रायलचे पंतप्रधान बेंजामिन नेतन्याहू यांच्या कार्यालयाने पाकिस्तानच्या त्या दाव्याला फेटाळून लावले की संघर्षविराम करारात लेबनानचाही समावेश आहे. याचदरम्यान वॉशिंग्टनमध्ये अमेरिकेचे राष्ट्राध्यक्ष डोनाल्ड ट्रम्प यांच्या प्रेस सचिव कॅरोलिन लेविट यांनीही स्पष्ट केले की लेबनान हा या कराराचा भाग नाही. दुसरीकडे, लेबनानच्या राष्ट्रपती कार्यालयाने शांतता कायम ठेवण्यासाठी प्रयत्न सुरू ठेवणार असल्याचे सांगितले.

इस्त्रायल आणि हिजबुल्लाह यांच्यात दशकांपासून सुरू असलेल्या संघर्षाला अलीकडेच नवे वळण मिळाले. युद्धाच्या सुरुवातीच्या टप्प्यात इराणचे सर्वोच्च नेते आयातुल्ला अली खामेनेई यांच्या हत्येचा बदला घेण्यासाठी हिजबुल्लाहने इस्त्रायलवर रॉकेट हल्ले केले होते. तसेच नोव्हेंबर २०२४ मध्ये युद्धविरामावर सहमती झाल्यानंतरही लेबनानवर होत असलेल्या इस्त्रायली हल्ल्यांच्या प्रत्युत्तरादाखल रॉकेट डागण्यात आले.

युद्धविरामाची घोषणा झाल्यानंतरही इस्त्रायली अधिकाऱ्यांनी संकेत दिले होते की इराणसोबत करार झाला तरी लेबनानमधील लष्करी मोहिम सुरूच राहील. अलीकडील दिवसांत इस्त्रायली माध्यमांनी लष्करी सूत्रांच्या हवाल्याने सांगितले की सैन्याचा हल्ला थांबवण्याचा कोणताही विचार नाही. तसेच हिजबुल्लाहकडून जबरदस्तीने शस्त्रे काढून घेणे शक्य नसल्याची कबुलीही त्यांनी दिली आहे.

---------------

हिंदुस्थान समाचार / Priyanka Bansode