मुंबई , 09 एप्रिल (हिं.स.)।देशांतर्गत शेअर बाजारातील सलग पाच दिवसांची गती गुरुवारी खंडित झाली. आठवड्याच्या चौथ्या व्यवहारदिनी सेन्सेक्स 931.25 अंकांनी (1.20%) घसरून 76,631.65 या पातळीवर बंद झाला. दिवसभरात सेन्सेक्समध्ये कमाल 1,215 अंकांची (1.56%) घसरण होऊन तो 76,347.90 पर्यंत खाली आला होता. दुसरीकडे, निफ्टी 222.25 अंकांनी (0.93%) घसरून 23,775.10 या स्तरावर बंद झाला. या दरम्यान एलअँडटी आणि जिओ फायनान्ससारख्या शेअर्समध्ये सुमारे तीन टक्क्यांची घसरण नोंदवण्यात आली.

बाजारातील घसरणीचे प्रमुख कारण म्हणजे पश्चिम आशियातील सुरू असलेल्या संघर्षाबाबतची अनिश्चितता. अमेरिका-इस्रायल आणि इराण यांच्यात युद्धविरामाची घोषणा झाल्यानंतरही दोन्ही बाजूंनी तणावपूर्ण वक्तव्ये करण्यात आली. लेबनानवरील इस्रायलच्या हल्ल्यांच्या प्रत्युत्तरात इराणने होर्मुज सामुद्रधुनी पुन्हा बंद केल्यानंतर युद्धविराम करार धोक्यात आल्याची चिन्हे दिसू लागली. त्यामुळे गुंतवणूकदारांमध्ये अनिश्चितता वाढली आणि त्याचा परिणाम प्रमुख निर्देशांकांच्या कामगिरीवर झाला. याशिवाय आशियाई आणि युरोपीय बाजारांतील कमकुवत कल, कच्च्या तेलाच्या किमतींमध्ये झालेली वाढ आणि परदेशी गुंतवणूकदारांकडून सुरू असलेली निधीची सततची माघार यामुळेही देशांतर्गत बाजारात चिंतेचे वातावरण निर्माण झाले. सेन्सेक्स: 76,631.65 — 931.25 अंकांची घसरण (-1.20%), निफ्टी: 23,775.10 — 222.25 अंकांची घसरण (-0.93%) झाली आहे.

सेन्सेक्समधील 30 कंपन्यांपैकी इंटरग्लोब एव्हिएशन, लार्सन अँड टुब्रो, एटर्नल, एचडीएफसी बँक, आयसीआयसीआय बँक आणि कोटक महिंद्रा बँक या प्रमुख घसरण झालेल्या कंपन्यांमध्ये समाविष्ट होत्या. तर भारत इलेक्ट्रॉनिक्स, पॉवर ग्रिड, एनटीपीसी आणि टाटा कन्सल्टन्सी सर्व्हिसेस या शेअर्समध्ये वाढ नोंदवली गेली. दरम्यान, जागतिक तेल निर्देशांक ब्रेंट क्रूडमध्ये 3.27 टक्क्यांची वाढ होऊन तो प्रति बॅरल 97.85 अमेरिकी डॉलरवर पोहोचला.

पश्चिम आशियातील तणावपूर्ण परिस्थिती कायम असल्याने गुरुवारी रुपया अमेरिकी डॉलरच्या तुलनेत 9 पैशांनी घसरून (तात्पुरता) 92.63 वर बंद झाला. होर्मुज सामुद्रधुनी पुन्हा खुली होईल का याबाबत गुंतवणूकदार सतर्क आहेत. फॉरेक्स व्यापाऱ्यांच्या मते, इस्रायलने लेबनानवरील बॉम्बहल्ले सुरूच ठेवले तर इराण युद्धविराम चर्चेतून माघार घेऊ शकतो, अशी शक्यता आहे. त्यामुळे भू-राजकीय अनिश्चितता अद्याप उच्च पातळीवर असून गुंतवणूकदार ठोस दिशा घेण्याऐवजी ‘वेट अँड वॉच’ भूमिकेत आहेत.

आंतरबँक परकीय चलन बाजारात रुपया डॉलरच्या तुलनेत 92.63 वर उघडला. त्यानंतर तो घसरून दिवसभरात 92.92 या नीचांकी पातळीवर पोहोचला, तर सत्रादरम्यान 92.53 हा उच्चांकही गाठला. दिवसअखेर रुपया डॉलरच्या तुलनेत 92.63 वर बंद झाला, जो मागील बंद पातळीपेक्षा 9 पैशांनी कमी होता.

---------------

हिंदुस्थान समाचार / Priyanka Bansode