नवी दिल्ली, 18 मे (हिं.स.)। देशांतर्गत शेअर बाजाराने सोमवारी सुरुवातीच्या व्यवहारात जवळपास दीड टक्क्यांची मोठी घसरण अनुभवल्यानंतर दिवसअखेर उल्लेखनीय पुनरागमन करत हिरव्या चिन्हात व्यवहार समाप्त केले. सकाळी व्यवहार सुरू होताच विक्रीचा दबाव वाढल्याने सेन्सेक्स आणि निफ्टी या दोन्ही प्रमुख निर्देशांकांमध्ये मोठी घसरण झाली होती. मात्र सकाळी दहाच्या सुमारास गुंतवणूकदारांनी मोठ्या प्रमाणात खरेदी सुरू केल्याने बाजारात जोरदार सुधारणा झाली आणि सेन्सेक्सने दिवसातील नीचांकी पातळीवरून तब्बल १,२८० अंकांहून अधिक उसळी घेतली. निफ्टीनेही तळाच्या स्तरावरून ३७५ अंकांपेक्षा अधिक वाढ नोंदवली. या जोरदार पुनरागमनामुळे दिवसअखेर सेन्सेक्स ०.१० टक्के आणि निफ्टी ०.०३ टक्क्यांच्या वाढीसह बंद झाले.

दिवसभर माहिती तंत्रज्ञान क्षेत्रातील समभागांमध्ये मोठ्या प्रमाणात खरेदी झाली. त्यामुळे निफ्टीचा माहिती तंत्रज्ञान निर्देशांक २.४३ टक्क्यांनी वाढून बंद झाला. आरोग्य सेवा आणि तंत्रज्ञान क्षेत्रातील समभागांमध्येही तेजी दिसून आली. दुसरीकडे वाहन उद्योग, ग्राहक टिकाऊ वस्तू आणि धातू क्षेत्रातील समभागांमध्ये मोठ्या प्रमाणावर विक्री झाली. सार्वजनिक क्षेत्रातील उद्योग, तेल आणि वायू, दैनंदिन उपभोग्य वस्तू, भांडवली वस्तू तसेच बँकिंग निर्देशांकही घसरणीसह लाल चिन्हात बंद झाले.

मध्यम आणि लघु भांडवली समभागांमध्ये झालेल्या विक्रीमुळे गुंतवणूकदारांचे मोठे नुकसान झाले. मुंबई शेअर बाजारात सूचीबद्ध कंपन्यांचे एकूण बाजार भांडवल व्यवहारअखेर ४५८.३८ लाख कोटी रुपयांवर घसरले. शुक्रवारी हेच बाजार भांडवल ४६०.०२ लाख कोटी रुपये होते. त्यामुळे एका दिवसात गुंतवणूकदारांचे सुमारे १.६४ लाख कोटी रुपयांचे नुकसान झाले.

सेन्सेक्सची सुरुवात ४३० अंकांच्या घसरणीसह ७४,८०७.९७ अंकांवर झाली होती. सकाळी विक्रीचा दबाव वाढल्याने निर्देशांक ७४,१८०.२६ अंकांपर्यंत घसरला. त्यानंतर झालेल्या जोरदार खरेदीमुळे सेन्सेक्सने पुनरागमन करत दिवसअखेर ७७.०५ अंकांच्या वाढीसह ७५,३१५.०४ अंकांवर बंद झाला. निफ्टीची सुरुवातही १६१ अंकांच्या घसरणीसह झाली होती. मात्र नंतरच्या खरेदीमुळे निर्देशांकाने सुधारणा करत ६.४५ अंकांच्या प्रतीकात्मक वाढीसह २३,६४९.९५ अंकांवर व्यवहार समाप्त केले.

दिवसभरातील व्यवहारात टेक महिंद्रा, इन्फोसिस, भारती एअरटेल, सन फार्मास्युटिकल्स आणि बजाज फिनसर्व हे सर्वाधिक वाढ नोंदवणारे समभाग ठरले. तर टाटा स्टील, पॉवर ग्रीड कॉर्पोरेशन, स्टेट बँक ऑफ इंडिया, एनटीपीसी आणि बजाज ऑटो या समभागांमध्ये सर्वाधिक घसरण झाली.

---------------

हिंदुस्थान समाचार / Suraj Chaugule