मुंबई, 02 मे (हिं.स.)। दक्षिण कोरियाची आघाडीची तंत्रज्ञान कंपनी सॅमसंग इंडिया मध्ये मोठा व्यवस्थापकीय बदल घडून आला आहे. कंपनीच्या मोबाईल व्यवसायाचे प्रमुख आणि वरिष्ठ उपाध्यक्ष पदावर कार्यरत असलेले राजू एंटनी पुल्लन यांनी आपल्या पदाचा राजीनामा दिला आहे. गेल्या सुमारे चार वर्षे आणि पाच महिने त्यांनी या महत्त्वाच्या पदाची जबाबदारी सांभाळली होती, तर एकूण १८ वर्षांचा त्यांचा सॅमसंगसोबतचा प्रवास अत्यंत उल्लेखनीय ठरला आहे.

राजू एंटनी पुल्लन यांनी व्यावसायिक नेटवर्किंग व्यासपीठ लिंक्डइन वर पोस्ट करत आपल्या राजीनाम्याची अधिकृत घोषणा केली. त्यांनी आपल्या पोस्टमध्ये सॅमसंगसोबतचा प्रवास “अतिशय समाधानकारक आणि समृद्ध अनुभव देणारा” असल्याचे नमूद केले. भारतातील लाखो घरांपर्यंत गॅलेक्सी मालिकेतील मोबाईल पोहोचवण्याची संधी मिळाल्याबद्दल त्यांनी अभिमान व्यक्त केला.

पुल्लन यांनी जानेवारी २०२२ मध्ये कंपनीच्या मोबाईल विभागाच्या प्रमुखपदाची सूत्रे हाती घेतली होती. या काळात त्यांनी कंपनीच्या विक्री, नियोजन आणि नवकल्पना यामध्ये महत्त्वाची भूमिका बजावली. त्यांच्या नेतृत्वाखाली मोबाईल अनुभव विभागात विविध सुधारणा आणि टिकाऊ प्रक्रिया विकसित करण्यात आल्या. त्यांनी सेल्स प्रमुख म्हणून तसेच एसओपी प्रमुख (भारत) म्हणूनही काम करताना व्यवसायात कार्यक्षमतेवर आणि नवोपक्रमांवर भर दिला.

सॅमसंग इंडिया मध्ये त्यांच्या कारकिर्दीचा प्रवास २००८ मध्ये सुरू झाला. तेव्हा त्यांनी ‘पश्चिम विभाग प्रमुख’ म्हणून काम पाहिले. त्यानंतर त्यांनी विक्री आणि किरकोळ विपणन संचालक, विक्री संचालन आणि नियोजन प्रमुख तसेच ग्राहक इलेक्ट्रॉनिक्स व्यवसाय प्रमुख अशा विविध जबाबदाऱ्या सांभाळल्या. या सर्व पदांवर त्यांनी कंपनीच्या विस्तारात महत्त्वपूर्ण योगदान दिले.

दरम्यान, पुल्लन यांच्या राजीनाम्यानंतर कंपनीत त्यांच्या उत्तराधिकारीबाबत चर्चांना वेग आला आहे. अधिकृत घोषणा अद्याप झालेली नसली तरी, एका अहवालानुसार आदित्य बब्बर यांना ही जबाबदारी दिली जाण्याची शक्यता आहे. सध्या ते मोबाईल अनुभव विभागात उत्पादन विपणन आणि ई-कॉमर्स विभागाचे उपाध्यक्ष म्हणून कार्यरत आहेत. कंपनीच्या डिजिटल आणि ऑनलाइन विक्री धोरणात त्यांनी महत्त्वाची भूमिका बजावली आहे.

अलीकडेच प्रसिद्ध झालेल्या बाजार विश्लेषण अहवालानुसार, सॅमसंग भारतातील दुसऱ्या क्रमांकाचा सर्वात मोठा मोबाईल ब्रँड म्हणून ओळखला जातो. अशा परिस्थितीत कंपनीच्या नेतृत्वात होणारा हा बदल भविष्यातील धोरणांवर परिणाम करणारा ठरू शकतो. विशेषतः भारतीय बाजारपेठेत स्पर्धा वाढत असताना, नवीन नेतृत्वाकडून अधिक आक्रमक आणि नवोन्मेषी धोरणांची अपेक्षा व्यक्त केली जात आहे.

पुल्लन यांनी आपल्या पुढील वाटचालीबाबत अद्याप कोणतीही स्पष्ट माहिती दिलेली नाही. मात्र त्यांनी नवीन संधी आणि नव्या प्रवासाबद्दल उत्सुकता व्यक्त केली आहे. त्यांच्या अनुभवाचा आणि नेतृत्वाचा फायदा त्यांना पुढील कारकिर्दीत नक्कीच होईल, अशी उद्योग क्षेत्रात चर्चा आहे.

---------------

हिंदुस्थान समाचार / Suraj Chaugule