नवी दिल्ली, 22 मे (हिं.स.) : नेपाळच्या काठमांडू येथून एक दुःखद बातमी समोर आली आहे. जगातील सर्वात उंच शिखर माउंट एव्हरेस्ट सर केल्यानंतर खाली उतरताना दोन भारतीय गिर्यारोहकांचा मृत्यू झाला आहे.

मिळालेल्या माहितीनुसार, मृत गिर्यारोहकांची ओळख अरुण कुमार तिवारी आणि संदीप अरे अशी झाली आहे. अतिशय थकव्यामुळे आणि शारीरिक क्षमतेचा अतिरेक झाल्याने त्यांचा मृत्यू झाल्याचे प्राथमिक अहवालात नमूद करण्यात आले आहे.

नेपाळ एक्स्पिडिशन ऑपरेटर्स असोसिएशनचे महासचिव ऋषी भंडारी यांनी सांगितले की, दोन्ही गिर्यारोहक शिखर सर केल्यानंतर परतीच्या मार्गावर अत्यंत थकले होते. मार्गदर्शकांनी त्यांना वाचवण्यासाठी सर्वतोपरी प्रयत्न केले, मात्र त्यांचे प्राण वाचवता आले नाहीत.

माहितीनुसार, संदीप अरे यांनी बुधवारी तर अरुण कुमार तिवारी यांनी गुरुवारी सायंकाळी सुमारे 5.30 वाजता एव्हरेस्ट सर केले होते. मात्र खाली उतरताना प्रकृती खालावल्याने ही दुर्दैवी घटना घडली.

याच मोहिमेत एकूण 274 गिर्यारोहकांनी एकाच दिवसात एव्हरेस्ट सर करून नवा विक्रम प्रस्थापित केला होता. या गटात इतर भारतीय गिर्यारोहक तुलसी रेड्डी पालपुनूरी आणि अजय पाल सिंह धालीवाल यांचाही समावेश होता. तसेच गुरुवारी लक्ष्मीकांता मंडल यांनीही जगातील सर्वात उंच शिखर सर केले.

या घटनेमुळे गिर्यारोहण क्षेत्रात शोककळा पसरली असून एव्हरेस्ट मोहिमेतील सुरक्षिततेबाबत पुन्हा एकदा चर्चा सुरू झाली आहे.

----------------------

हिंदुस्थान समाचार / Priyanka Bansode