बीड, 24 मे (हिं.स.)।

केज तालुक्यातील सोनी जवळा येथे झालेल्या वादळी पाऊस आणि वीज कोसळल्याच्या भीषण घटनेत दिगंबर भीमराव ससाणे (रा. सोनी जवळा, ता. केज) या ४५ वर्षीय शेतकऱ्याचा जागीच दुर्दैवी मृत्यू झाला.

युसुफ वडगाव मंडळात अचानक कडाक्याच्या वादळासह अवकाळी पावसाने जोरदार हजेरी लावली. यावेळी शेतात काम करत असताना वादळापासून स्वतःचा बचाव करण्यासाठीयांनी एका मोठ्या आंब्याच्या झाडाचा आश्रय घेतला. मात्र, नियतीला काही वेगळेच मान्य होते. त्याच आंब्याच्या झाडावर अचानक वीज कोसळली. विजेचा धक्का आणि वादळाचा प्रचंड वेग यामुळे हे झाड मुळासकट उखडले गेले. या झाडाखाली चिरडून जागीच अंत झाला. या काळजाचा थरकाप उडवणाऱ्या घटनेमुळे सोनी जवळा गावावर शोककळा पसरली आहे.

आलेल्या या अनपेक्षित वादळाने युसुफ वडगाव परिसराला अक्षरशः झोडपून काढले असून सगळीकडे हाहाकार माजवला आहे. निसर्गाच्या या रौद्ररूपामुळे अनेक कुटुंबांचे संसार उघड्यावर आले असून शेतकऱ्यांच्या डोळ्यात पाणी आले आहे. कुटुंबावर तर दुःखाचा डोंगरच कोसळला आहे. एका बाजूल शेतात मृत्यू झाला, तर दुसऱ्या बाजूला त्यांच्या राहत्या घराच्या दारात असलेले चिंचेचे मोठे झाडही या वादळाने मुळासकट उपटून पडले. इतकेच नव्हे तर, त्यांनी शेतीसाठी नुकतेच नवीन वीज ट्रान्सफॉर्मर मंजूर करून आणले होते. मात्र, या निसर्गाच्या कोपामुळे ते नवीन ट्रान्सफॉर्मर आणि त्याचे सर्व विद्युत खांबही जमिनीवर कोसळून चक्काचूर झाले. परिसरात अनेक ठिकाणी विजेचे खांब आणि झाडे उन्मळून पडल्याने वीज पुरवठा पूर्णपणे खंडित झाला असून नागरिकांना मोठ्या त्रासाला सामोरे जावे लागत आहे. प्रशासनाने या घटनेची गांभीर्याने दखल घेऊन तातडीने पंचनामे करावेत आणि पीडित शेतकरी कुटुंबाला तात्काळ मदत द्यावी, अशी मागणी स्थानिक नागरिकांमधून केली जात आहे.

---------------

हिंदुस्थान समाचार / Aparna Chitnis