मुंबई, 26 मे (हिं.स.)। ट्रायम्फ मोटरसायकलने भारतीय बाजारात आपल्या प्रीमियम ॲडव्हेंचर मोटरसायकल श्रेणीचा विस्तार करत टायगर ९०० मालिकेतील दोन नवीन स्पेशल एडिशन्स सादर केल्या आहेत. कंपनीने टायगर ९०० अल्पाईन एडिशन आणि टायगर ९०० डेजर्ट एडिशन या दोन खास मॉडेल्स बाजारात आणल्या असून, या दोन्ही मोटरसायकलींमध्ये आकर्षक रंगसंगती, फॅक्टरी-फिटेड ॲक्सेसरीज आणि लांब पल्ल्याच्या टूरिंग तसेच ऑफ-रोड रायडिंगसाठी अधिक सक्षम वैशिष्ट्ये देण्यात आली आहेत.
टायगर ९०० अल्पाईन एडिशनची एक्स-शोरूम किंमत १५.३५ लाख रुपये ठेवण्यात आली आहे, तर टायगर ९०० डेजर्ट एडिशनची किंमत १६.०५ लाख रुपये आहे. अल्पाईन एडिशन स्नोडोनिया व्हाईट, ग्राफिक ब्लॅक आणि एजियन ब्ल्यू अशा आकर्षक रंगसंगतीमध्ये उपलब्ध आहे. दुसरीकडे, डेजर्ट एडिशन अर्बन ग्रे आणि सॅफायर ब्लॅक रंगांमध्ये सादर करण्यात आली आहे. या दोन्ही मोटरसायकलींची बुकिंग कंपनीच्या अधिकृत संकेतस्थळावर आणि जवळच्या ट्रायम्फ डीलरशिपमध्ये सुरू झाली आहे.
टायगर ९०० अल्पाईन एडिशन ही जीटी प्रो व्हेरिएंटवर आधारित असून, विशेषतः महामार्गावरील आणि लांब अंतराच्या प्रवासासाठी विकसित करण्यात आली आहे. ब्ल्यू ॲक्सेंटसह पांढऱ्या रंगाची प्रीमियम रंगसंगती या मोटरसायकलला आकर्षक आणि सोज्वळ लूक देते. या मॉडेलमध्ये इंजिन प्रोटेक्शन बार आणि अक्रापोविक एक्झॉस्ट स्टँडर्ड स्वरूपात देण्यात आला आहे. त्यामुळे रायडिंग अधिक आरामदायी होण्यासोबतच स्पोर्टी आवाजाचाही अनुभव मिळतो. यामध्ये टीएफटी इन्स्ट्रुमेंट क्लस्टर, विविध रायडिंग मोड्स आणि प्रगत इलेक्ट्रॉनिक फीचर्सचा समावेश करण्यात आला आहे.
टायगर ९०० डेजर्ट एडिशन ही अधिक दमदार रॅली प्रो व्हेरिएंटवर आधारित आहे. बाजा ऑरेंज हायलाइट्स आणि ॲडव्हेंचर-केंद्रित डिझाइनमुळे या मोटरसायकलला मोहिमेसाठी तयार असलेला मजबूत लूक मिळतो. या मॉडेलमध्ये फ्युएल टँक प्रोटेक्शन बार, लाँग-ट्रॅव्हल सस्पेन्शन आणि अक्रापोविक सायलेंसर देण्यात आला आहे. तसेच २१ इंचाचे फ्रंट व्हील आणि १७ इंचाचे रिअर व्हील ऑफ-रोड रायडिंगसाठी अधिक सक्षम मानले जातात. विशेष म्हणजे अतिरिक्त ॲक्सेसरीज आणि खास डिझाइन असूनही या एडिशनची किंमत स्टँडर्ड रॅली प्रोच्या तुलनेत १० हजार रुपयांनी कमी ठेवण्यात आली आहे.
दोन्ही स्पेशल एडिशन्समध्ये ८८८ सीसी क्षमतेचे लिक्विड-कूल्ड इनलाइन ट्रिपल सिलेंडर टी-प्लेन इंजिन देण्यात आले आहे. हे इंजिन ९,५०० आरपीएमवर १०६.५२ बीएचपी शक्ती आणि ६,८५० आरपीएमवर ९० न्यूटन मीटर टॉर्क निर्माण करते. इंजिनसोबत ६-स्पीड गिअरबॉक्स आणि बाय-डायरेक्शनल क्विकशिफ्टर स्टँडर्ड स्वरूपात उपलब्ध आहे. प्रीमियम सस्पेन्शन हार्डवेअर आणि प्रगत रायडर सहाय्यक तंत्रज्ञानामुळे या दोन्ही मोटरसायकली ॲडव्हेंचर रायडर्ससाठी आकर्षक पर्याय ठरणार आहेत.
---------------
हिंदुस्थान समाचार / Suraj Chaugule
