कोलकाता, 06 मे (हिं.स.)। भारत निवडणूक आयोगाने पश्चिम बंगालमध्ये विधानसभा निवडणुकीचे निकाल लागल्यानंतर होत असलेल्या हिंसाचार आणि तोडफोडीच्या घटनांबाबत कडक निर्देश जारी केले आहेत. मुख्य निवडणूक आयुक्त ज्ञानेश कुमार यांनी सांगितले आहे की, हिंसाचारात सहभागी असलेल्या लोकांविरुद्ध कठोर कारवाई केली जाईल. दरम्यान, कोलकात्यातील न्यूटाउन परिसरात मंगळवारी मधु मंडल नावाच्या भाजप कार्यकर्त्याची मारहाण करून हत्या करण्यात आली. या घटनेनंतर कुटुंबीय आणि स्थानिक नागरिकांनी निषेध आंदोलन केले. परिस्थिती नियंत्रणात आणण्यासाठी पोलिसांना लाठीचार्ज करावा लागला.

माहितीनुसार, निवडणुकीचे निकाल जाहीर झाल्यानंतर राज्यातील विविध भागांतून हिंसाचार आणि तोडफोडीच्या तक्रारी समोर येत आहेत. याचा विचार करून मुख्य निवडणूक आयुक्तांनी राज्याचे मुख्य सचिव, पोलीस महासंचालक, कोलकाता पोलीस आयुक्त तसेच केंद्रीय सशस्त्र पोलीस दलांचे महासंचालक यांना आवश्यक पावले उचलण्याचे निर्देश दिले आहेत.

यासोबतच सर्व जिल्हाधिकारी, पोलीस अधीक्षक आणि इतर पोलीस अधिकाऱ्यांना सतत गस्त घालण्याचे आणि परिस्थितीवर लक्ष ठेवण्याचे आदेश देण्यात आले आहेत. निवडणूक आयोगाने स्पष्ट केले आहे की निवडणुकीनंतर होणाऱ्या कोणत्याही प्रकारच्या हिंसाचाराविरुद्ध शून्य सहनशीलतेची नीती अवलंबली जाईल.

---------------

हिंदुस्थान समाचार / Suraj Chaugule