नवी दिल्ली, 10 जून (हिं.स.)। देशातील प्राइमरी मार्केट पुन्हा एकदा वेग पकडताना दिसत आहे. मार्केट रेग्युलेटर सिक्युरिटीज अँड एक्सचेंज बोर्ड ऑफ इंडिया (सेबी) यांनी विविध क्षेत्रांतील पाच कंपन्यांना आयपीओ आणण्यासाठी ऑब्झर्वेशन लेटर जारी केले आहे. म्हणजेच या कंपन्यांना आयपीओ आणण्यासाठी सेबीकडून मंजुरी मिळाली आहे.

सेबीने औद्योगिक उपकरणे, कृषी, हॉस्पिटॅलिटी, रिअल इस्टेट आणि हाऊसिंग फायनान्स या क्षेत्रांतील कंपन्यांना आयपीओ आणण्यासाठी मंजुरी दिली आहे. या कंपन्यांमध्ये हॉस्पिटॅलिटी क्षेत्रात काम करणारी ओयोची पॅरेंट कंपनी ऑरवेल स्टेज, रिअल इस्टेट क्षेत्रातील कंपनी विगालँड डेव्हलपर्स, अफोर्डेबल हाऊसिंग फायनान्स कंपनी ट्रू होम फायनान्स, कृषी क्षेत्रातील कंपनी अडवांटा एंटरप्रायझेस आणि औद्योगिक उपकरणे बनवणारी कंपनी मेहता हायटेक इंडस्ट्रीज यांचा समावेश आहे.

सर्वप्रथम ओयोच्या पॅरेंट कंपनी ऑरवेल स्टेजबद्दल बोलूया. ही कंपनी हॉस्पिटॅलिटी क्षेत्रात टेक्नॉलॉजी-आधारित प्लॅटफॉर्म चालवते. कंपनी हॉटेल, व्हेकेशन होम्स आणि इतर निवासी सेवांच्या क्षेत्रात आपली वेगळी ओळख निर्माण करत आहे. सेबीने या कंपनीला ६,६५० कोटी रुपयांचा आयपीओ आणण्यासाठी ऑब्झर्वेशन लेटर जारी केले आहे. कंपनी आपल्या आयपीओच्या माध्यमातून व्यवसाय विस्तारासाठी निधी उभारण्याची योजना आखत आहे. या आयपीओद्वारे कंपनी आपले मूल्यांकन वाढवून ६६ हजार कोटी रुपयांपर्यंत नेऊ इच्छित आहे. काही वर्षांपूर्वी सतत तोट्याचा सामना करणारी ही कंपनी मागील काही वर्षांत नफ्यात येण्याच्या मार्गावर आली आहे, त्यामुळे तिच्या आयपीओबाबत बाजारात मोठी उत्सुकता आहे.

याचप्रमाणे केरळमधील रिअल इस्टेट कंपनी विगालँड डेव्हलपर्सलाही सेबीकडून आयपीओ आणण्यासाठी ऑब्झर्वेशन लेटर मिळाले आहे. या आयपीओद्वारे कंपनी २५० कोटी रुपये उभारू इच्छित आहे. या आयपीओमध्ये केवळ नवीन शेअर्स जारी केले जातील; कोणतीही ऑफर फॉर सेल (OFS) नसेल. या निधीचा वापर कंपनी आपल्या निवासी प्रकल्पांच्या विस्तारासाठी, नवीन जमिनीच्या खरेदीसाठी आणि सामान्य कॉर्पोरेट उद्देशांसाठी करणार आहे.

सेबीने अफोर्डेबल हाऊसिंग फायनान्स कंपनी ट्रू होम फायनान्सलाही आयपीओ आणण्यासाठी मंजुरी दिली आहे. या आयपीओद्वारे कंपनी प्राइमरी मार्केटमधून ३,००० कोटी रुपये उभारू इच्छित आहे. यात १,५०० कोटी रुपयांचे नवीन शेअर्स जारी केले जातील, तर १,५०० कोटी रुपयांचे शेअर्स ऑफर फॉर सेल विंडोद्वारे विकले जातील. ऑफर फॉर सेलद्वारे कंपनीचा विद्यमान भागधारक मॅंगो क्रेस्ट इन्व्हेस्टमेंट आपला हिस्सा कमी करेल. नवीन शेअर्समधून मिळालेला निधी कंपनी आपला कॅपिटल बेस मजबूत करण्यासाठी आणि वर्किंग कॅपिटलच्या गरजा पूर्ण करण्यासाठी वापरणार आहे.

कृषी सोल्यूशन उपलब्ध करून देणारी कंपनी अडवांटा एंटरप्रायझेसलाही सेबीने आयपीओ आणण्यासाठी मंजुरी दिली आहे. या कंपनीचा आयपीओ पूर्णपणे ऑफर फॉर सेल स्वरूपाचा असेल. या आयपीओअंतर्गत कंपनीचे विद्यमान भागधारक ३.६१ कोटी इक्विटी शेअर्सची विक्री करतील. अडवांटा एंटरप्रायझेस हायब्रिड बियाणे आणि कापणीनंतरच्या प्रक्रिया सुविधांशी संबंधित सेवा देते.

त्याचप्रमाणे औद्योगिक उपकरणे बनवणारी कंपनी मेहता हायटेक इंडस्ट्रीजलाही सेबीने आयपीओ आणण्यासाठी मंजुरी दिली आहे. कंपनी आयपीओ अंतर्गत ६२ लाख नवीन इक्विटी शेअर्स जारी करेल. या निधीचा वापर कंपनी कॅपिटल एक्स्पेंडिचर, वर्किंग कॅपिटलच्या गरजा आणि इतर कॉर्पोरेट उद्देशांसाठी करणार आहे. ही कंपनी कार्बन डायऑक्साइड लेझर सिस्टीम, सीएनसी राउटर, फायबर लेझर मशीन आणि डिजिटल प्रिंटर यांसारखी औद्योगिक उपकरणे तयार करते.

---------------

हिंदुस्थान समाचार / Suraj Chaugule