नवी दिल्ली, 10 जून (हिं.स.)आयसीसीच्या 'पिच अँड आउटफिल्ड मॉनिटरिंग प्रोसेस'नुसार, लंडनच्या लॉर्ड्सवरील इंग्लंड आणि न्यूझीलंड यांच्यातील पहिल्या कसोटी सामन्याची खेळपट्टी आणि लाहोरमधील गद्दाफी स्टेडियमवरील पाकिस्तान आणि ऑस्ट्रेलिया यांच्यातील तिसऱ्या एकदिवसीय सामन्याची खेळपट्टी असमाधानकारक ठरवण्यात आली आहे. दोन्ही मैदानांना प्रत्येकी एक डिमेरिट पॉइंट देण्यात आला आहे. सामना अधिकारी आणि कर्णधारांच्या तक्रारींनंतर, लॉर्ड्सचे सामनाधिकारी अँडी पायक्रॉफ्ट आणि गद्दाफी स्टेडियमचे ग्रॅम ला ब्रूय यांनी त्यांच्या अहवालात ही नोंद केली.
पायक्रॉफ्ट यांनी सांगितले की, संपूर्ण कसोटीदरम्यान लॉर्ड्सच्या खेळपट्टीवर चेंडूला जास्त सीम येत होता आणि काही वेळा चेंडू खूप खाली टप्पा पडत होता, ज्यामुळे चेंडूला असमान उसळी मिळत होती. पहिल्या कसोटीच्या चौथ्या दिवशी इंग्लंडने न्यूझीलंडचा ११५ धावांनी पराभव केला. २५४ धावांच्या लक्ष्याला प्रत्युत्तर देताना न्यूझीलंडचा संघ १३८ धावांवर सर्वबाद झाला. हा अहवाल इंग्लंड आणि वेल्स क्रिकेट बोर्ड आणि पाकिस्तान क्रिकेट बोर्डाकडे सादर करण्यात आला असून, त्यांना अपील करण्यासाठी १४ दिवसांची मुदत आहे.
आयसीसीच्या नियमांनुसार, खेळपट्टी असमाधानकारक ठरल्यास स्टेडियमला एक डिमेरिट पॉइंट आणि खेळपट्टी अयोग्य ठरल्यास तीन डिमेरिट पॉइंट दिले जातात. सहा डिमेरिट पॉइंट मिळाल्यास मैदानावर १२ महिन्यांसाठी आंतरराष्ट्रीय सामने आयोजित करण्यावर बंदी घातली जाईल.
---------------
हिंदुस्थान समाचार / वृषाली देशपांडे
