नवी दिल्ली, 10 जून (हिं.स.) - युवा भारतीय फिरकी गोलंदाज मानव सुथार आता इंग्लंडमध्ये खेळताना दिसणार आहे. त्याला इंग्लिश काउंटी संघ वॉरविकशायरने काउंटी चॅम्पियनशिपमध्ये खेळण्यासाठी बोलावले आहे. मानव सुथार संघाच्या पुढील दोन सामन्यांसाठी उपलब्ध असेल. त्याने गेल्या आठवड्यात भारत-अफगाणिस्तान कसोटीत आंतरराष्ट्रीय पदार्पण केले. मानव सुथारने पहिल्या सामन्यात सहा आणि दुसऱ्या सामन्यात एक बळी घेतला. या कामगिरीमुळे त्याला सामनावीर पुरस्कार मिळाला.

मानव सुथार पहिल्यांदाच काउंटी चॅम्पियनशिपमध्ये खेळणार आहे. त्याने २९ प्रथम-श्रेणी सामन्यांमध्ये १२९ बळी घेतले आहेत. भारतासाठी कसोटी पदार्पण करण्यापूर्वी, त्याने देशांतर्गत क्रिकेटमध्ये राजस्थान आणि इंडिया 'अ' संघासाठी उत्कृष्ट कामगिरी केली होती. भविष्यात भारतीय कसोटी संघातील फिरकी गोलंदाजीचे भविष्य म्हणून त्याच्याकडे पाहिले जात आहे.

वॉरविकशायर क्लबने जाहीर केले की, काउंटी चॅम्पियनशिपच्या पुढील दोन फेऱ्यांसाठी मानवला करारबद्ध करण्यात आले आहे. क्लबचे परफॉर्मन्स डायरेक्टर जेम्स थॉमस म्हणाले, मानवचे 'बेअर्स' परिवारात स्वागत करताना आम्हाला खूप आनंद होत आहे. संघासाठी हा खरोखरच एक रोमांचक क्षण आहे. आम्ही या हंगामात आतापर्यंत उत्कृष्ट क्रिकेट खेळलो आहोत आणि मानव आमच्या गोलंदाजीला एक नवीन दृष्टीकोन देईल. गेल्या आठवड्यात कसोटी संघात त्याची निवड झाली, यावरूनच भारतात त्याला इतके महत्त्व का दिले जाते हे दिसून येते.

वॉरविकशायरचा पुढचा काउंटी चॅम्पियनशिप सामना १२ जून रोजी यॉर्कशायरविरुद्ध आहे. त्यानंतर त्यांचा पुढचा सामना सॉमरसेटविरुद्ध होईल. वॉरविकशायरने आतापर्यंत सहा सामने खेळले असून, त्यात दोन जिंकले आहेत आणि तीन अनिर्णित राहिले आहेत. ते ८६ गुणांसह दुसऱ्या स्थानावर आहेत. संघात ब्यू वेबस्टर आणि ख्रिस वोक्ससारखे क्रिकेटपटू आहेत.

मानव सुथार काउंटी चॅम्पियनशिपबद्दल म्हणाला, मी पुढच्या दोन सामन्यांसाठी वॉरविकशायरमध्ये सामील होण्यास उत्सुक आहे. संघाने हंगामाची चांगली सुरुवात केली आहे, त्यामुळे त्यांना विजेतेपद मिळवून देण्यासाठी मदत करण्याची मला आशा आहे.

---------------

हिंदुस्थान समाचार / वृषाली देशपांडे