काबुल, 10 जून (हिं.स.) । अफगाणिस्तानने दावा केला आहे की, पाकिस्तानने पुन्हा एकदा त्यांच्या हद्दीत हवाई हल्ले केले असून, त्यात किमान १३ जण ठार आणि १४ जण जखमी झाले आहेत. या हल्ल्यांमुळे दोन शेजारी देशांमधील आधीच असलेला तणाव आणखी वाढला आहे. अफगाण तालिबान सरकारचे मुख्य प्रवक्ते झबिहुल्ला मुजाहिद यांनी बुधवारी सांगितले की, पाकिस्तानी हवाई हल्ले खोस्त, कुनार आणि पक्तिका प्रांतांमध्ये करण्यात आले. त्यांच्या म्हणण्यानुसार, या हल्ल्यांमध्ये ११ मुले, एक महिला आणि एक वृद्ध व्यक्ती ठार झाले.

तालिबान सरकारने या हल्ल्यांचा तीव्र शब्दांत निषेध केला असून, हे हल्ले नागरिकांना लक्ष्य करणारे असल्याचे म्हटले आहे. तथापि, पाकिस्तानकडून तात्काळ कोणतीही अधिकृत प्रतिक्रिया किंवा दुजोरा मिळाला नाही. गेल्या अनेक महिन्यांपासून पाकिस्तान आणि अफगाणिस्तानच्या सीमेवर तणाव कायम आहे. फेब्रुवारीच्या अखेरीपासून दोन्ही देशांमध्ये वारंवार चकमकी आणि प्रतिहल्ले होत असून, त्यात शेकडो नागरिकांचा मृत्यू झाला आहे.

पाकिस्तानने बऱ्याच काळापासून असा आरोप केला आहे की, पाकिस्तानमध्ये हल्ले करणाऱ्या दहशतवादी संघटनांकडून अफगाण भूभागाचा वापर केला जात आहे. पाकिस्तान विशेषतः तहरीक-ए-तालिबान पाकिस्तान (टीटीपी) बद्दल चिंता व्यक्त करतो. पाकिस्तानचा दावा आहे की, टीटीपीचे लढवय्ये अफगाणिस्तानात आश्रय घेतात आणि पाकिस्तानात दहशतवादी हल्ले करतात.

टीटीपी ही अफगाण तालिबानपेक्षा एक वेगळी संघटना आहे, पण या दोन्हींमध्ये वैचारिक आणि सामरिक संबंध असल्याचे मानले जाते. २०२१ मध्ये अमेरिकेच्या नेतृत्वाखालील सैन्याच्या माघारीनंतर तालिबानने अफगाणिस्तानात सत्ता काबीज केली. तेव्हापासून, पाकिस्तानने काबूलवर टीटीपीला आश्रय दिल्याचा सातत्याने आरोप केला आहे. अफगाणिस्तानातील तालिबान सरकारने हे आरोप सातत्याने नाकारले असून, आपला भूभाग कोणत्याही देशाविरुद्ध वापरला जाऊ देत नाही, असे म्हटले आहे. हवाई हल्ल्यांमुळे या प्रदेशातील तणाव आणखी वाढला आहे.

---------------

हिंदुस्थान समाचार / वृषाली देशपांडे