तेहरान, 11 जून (हिं.स.) : मध्यपूर्वेतील तणाव शिगेला पोहोचला आहे. अमेरिकेच्या सेंट्रल कमांडने इराणमधील अनेक लष्करी तळांवर हवाई हल्ल्यांची मालिका केली आहे. दरम्यान, इराणच्या प्रत्युत्तराच्या धमकीने संपूर्ण प्रदेशात खळबळ उडाली आहे.
अमेरिकेने इराणवर केलेल्या हल्ल्यानंतर इराणने प्रत्युत्तरात्मक कारवाई सुरू केली आहे. इराणच्या हल्ल्यांना प्रत्युत्तर म्हणून बहरीनमध्ये सायरन वाजवण्यात आले असून क्षेपणास्त्र हल्ल्याचा इशारा देण्यात आला आहे, तर कुवेतने सुरक्षेच्या कारणास्तव आपली हवाई संरक्षण प्रणाली सक्रिय केली आहे. कुवेती लष्कराच्या म्हणण्यानुसार, ही हवाई संरक्षण प्रणाली शत्रूच्या हवाई लक्ष्यांवर निशाणा साधत आहे.
इराणने दावा केला आहे की, त्यांच्या सैन्याने कुवेत आणि बहरीनमधील १८ अमेरिकी लष्करी तळांवर हल्ला करून प्रत्युत्तर दिले आहे. इराणी माध्यमांनुसार, हे हल्ले कुवेतमधील अली अल-सलेम आणि अहमद अल-जाबेर विमानतळांवर आणि बहरीनमधील शेख ईसा विमानतळावर करण्यात आले. इराणने झांजन, तब्रीझ आणि उर्मिया या शहरांमधून जॉर्डनच्या दिशेने बॅलिस्टिक क्षेपणास्त्रे डागली.
अमेरिकेच्या हल्ल्यानंतर, इराणने प्रत्युत्तरादाखल हल्ले केले आहेत. इराणच्या सततच्या हल्ल्यांमुळे कुवेतने आपली हवाई हद्द बंद केली आहे. कुवेतच्या नागरी हवाई वाहतूक महासंचालनालयाने ही घोषणा केली.
इराणच्या सरकारी माध्यमांनुसार, अमेरिकेने देशाच्या दक्षिणेवर केलेल्या हल्ल्यांना प्रत्युत्तर म्हणून इराणच्या लष्कराने बहरीनमधील अमेरिकेच्या पाचव्या नौदलाला ड्रोनद्वारे लक्ष्य केले. इराणने कुवेत आणि बहरीनमधील अमेरिकेच्या लष्करी तळांवर प्रत्युत्तरादाखल हल्ले केले. बहरीनच्या गृह मंत्रालयाने सांगितले की, देशाचा धोक्याचा सायरन पुन्हा वाजवण्यात आला.
अमेरिकेच्या सेंट्रल कमांडने म्हटले आहे की, इराणच्या अन्यायकारक आणि सततच्या आक्रमकतेला प्रत्युत्तर म्हणून इराणमधील लष्करी निगराणी क्षमता, दळणवळण प्रणाली आणि हवाई संरक्षण स्थळांना लक्ष्य करण्यात आले. हे हल्ले तेहरानमध्ये मध्यरात्रीनंतर थोड्याच वेळात सुरू झाले आणि सुमारे चार तासांनंतर संपले.
---------------
हिंदुस्थान समाचार / वृषाली देशपांडे
