न्यूयॉर्क, १७ जून (हिं.स.) : दोन वेळच्या विश्वविजेत्या फ्रान्सने आपल्या फिफा विश्वचषक २०२६ मोहिमेची सुरुवात विजयाने केली. गट 'आय'च्या सामन्यात फ्रान्सने सेनेगलला ३-१ ने पराभूत केले, ज्यात स्टार स्ट्रायकर किलियन एम्बाप्पेने दोन गोल केले.

पहिल्या हाफमध्ये सेनेगलने फ्रान्ससमोर कडवे आव्हान उभे केले, अनेक संधी निर्माण केल्या, पण त्यांना गोल करण्यात अपयश आले. सुरुवातीच्या ४५ मिनिटांत फ्रान्सलाही संघर्ष करावा लागला.दुसऱ्या हाफमध्ये प्रशिक्षक डिडिएर देशाउन यांची रणनीती यशस्वी ठरली. उजव्या विंगवरून मायकल ओलिसेहला मैदानात उतरवल्याने फ्रान्सच्या आक्रमणाला गती मिळाली. याचे फळ ६६ व्या मिनिटाला मिळाले, जेव्हा ओलिसेहच्या एका अप्रतिम पासवर एमबाप्पेने बॉक्समध्ये वेगवान मुसंडी मारत गोल केला आणि फ्रान्सला १-० अशी आघाडी मिळवून दिली. त्यानंतर फ्रान्सने दबाव कायम ठेवला आणि सामन्याच्या अंतिम टप्प्यात ब्रॅडली बारकोलाने दुसरा गोल करून त्यांची आघाडी दुप्पट केली. जरी इब्राहिम म्बायेने अतिरिक्त वेळेत सेनेगलसाठी गोल करून स्कोअर २-१ असा केला, तरी फ्रान्सची आघाडी फार काळ धोक्यात नव्हती.

सामन्याच्या ९६ व्या मिनिटाला, एम्बाप्पेने एका शानदार लांब पल्ल्याच्या शॉटने आपला दुसरा आणि संघाचा तिसरा गोल केला. या गोलमुळे, एम्बाप्पे फ्रान्सचा आतापर्यंतचा सर्वाधिक गोल करणारा फुटबॉलपटू बनला. आंतरराष्ट्रीय फुटबॉलमध्ये त्याचे आता ५८ गोल झाले आहेत. म्बाप्पेने विश्वचषक इतिहासात एक नवीन टप्पाही गाठला आहे. त्याचे विश्वचषकातील गोल १४ झाले असून, तो आतापर्यंतचा सर्वाधिक गोल करणारे फुटबॉलपटू अर्जेन्टीनाचा लिओनेल मेस्सी आणि मिरोस्लाव क्लोझ (१६) यांच्यापेक्षा फक्त दोन गोलने मागे आहे.

आता फ्रान्सचा पुढील सामना इराकशी होणार आहे. त्यानंतर अर्लिंग हालंडच्या नॉर्वेशी सामना होईल. दरम्यान, सेनेगलला आपल्या नॉकआऊट फेरीतील आशा जिवंत ठेवण्यासाठी आगामी सामन्यांमध्ये सुधारणा करावी लागेल.

---------------

हिंदुस्थान समाचार / वृषाली देशपांडे