रायगड, 17 जून (हिं.स.)। परदेशात आकर्षक पगाराची नोकरी मिळवून देण्याचे आमिष दाखवत एका युवकाची तब्बल ३ लाख ९९ हजार ९९९ रुपयांची फसवणूक केल्याप्रकरणी तिघांविरोधात म्हसळा पोलीस ठाण्यात गुन्हा दाखल करण्यात आला आहे. या घटनेमुळे नोकरीच्या शोधात असलेल्या युवकांमध्ये चिंतेचे वातावरण निर्माण झाले आहे.

पोलिसांनी दिलेल्या माहितीनुसार, फिर्यादी यांना मोबाईलद्वारे संपर्क साधून आरोपी क्रमांक १ याने परदेशात नोकरी मिळवून देण्याचे आश्वासन दिले. त्यानंतर फिर्यादी यांना मुंबई येथील कार्यालयात पाठविण्यात आले. तेथे आरोपी क्रमांक ३ याने त्यांची आरोपी क्रमांक २ यांच्याशी भेट घडवून आणली. आरोपींनी एका जहाजावर रिक्त पद उपलब्ध असल्याचे सांगून नोकरीसाठी आवश्यक प्रक्रिया पूर्ण करण्याच्या नावाखाली फिर्यादीकडून ३ लाख ९९ हजार ९९९ रुपयांची रक्कम स्वीकारली.

रक्कम स्वीकारल्यानंतर आरोपींनी फिर्यादी यांना जवळपास एक महिना थांबवून ठेवले. मात्र कोणतीही नोकरी उपलब्ध करून न देता त्यांना परत भारतात पाठविण्यात आले. त्यानंतर फिर्यादी यांनी संबंधित कार्यालयात जाऊन चौकशी केली असता आरोपींकडून उडवाउडवीची उत्तरे देण्यात आली. तसेच पैसे परत मागूनही आरोपी टाळाटाळ करीत असल्याचे तक्रारीत नमूद करण्यात आले आहे.

या प्रकरणी आरोपी क्रमांक १, २ व ३ यांनी संगनमताने फसवणूक केल्याचा आरोप असून म्हसळा पोलीस ठाण्यात गुन्हा क्रमांक ९२/२०२६ नुसार भारतीय न्याय संहिता २०२३ च्या कलम ४२० आणि ३४ अंतर्गत गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक पोटकुळे करीत आहेत.

---------------

हिंदुस्थान समाचार / संदेश साळुंके (रायगड)