वेलिंग्टन, १७ जून (हिं.स.)न्यूझीलंड क्रिकेट बोर्डाने 2026-27 हंगामासाठी पुरुष क्रिकेटपटूंची केंद्रीय करार यादी जाहीर केली आहे. या 20 सदस्यांच्या यादीत शीर्ष फळीतील फलंदाज डेव्हॉन कॉनवे आणि वेगवान गोलंदाज ब्लेअर टिकनरचे पुनरागमन झाले आहे, तर आदित्य अशोक आणि मोहम्मद अब्बास यांना वगळण्यात आले आहे. न्यूझीलंड क्रिकेट बोर्डाने त्याची अधिकृत घोषणा केली.

जगभरातील टी-२० लीग्समधील व्यस्त वेळापत्रकामुळे डेव्हन कॉनवे गेल्या दोन वर्षांपासून न्यूझीलंड बोर्डाशी मर्यादित कराराअंतर्गत जोडला गेला होता. पण, आता तो ऑगस्ट २०२६ ते जुलै २०२७ पर्यंत राष्ट्रीय संघाच्या सर्व आंतरराष्ट्रीय सामन्यांसाठी उपलब्ध झाला आहे.

न्यूझीलंडचे मुख्य प्रशिक्षक रॉब वॉल्टर म्हणाले की, कॉनवे बऱ्याच काळापासून तिन्ही फॉरमॅटमध्ये संघाचा एक महत्त्वाचा सदस्य राहिला आहे आणि त्याचे पुनरागमन अशा वेळी झाले आहे, जेव्हा संघ महत्त्वपूर्ण बदलांना सामोरे जात आहे. विशेषतः केन विल्यमसनच्या अलीकडील निवृत्तीनंतर, कॉनवेचा अनुभव संघासाठी महत्त्वपूर्ण मानला जातो. दुसरीकडे, वेगवान गोलंदाज ब्लेअर टिकनरने देशांतर्गत आणि आंतरराष्ट्रीय क्रिकेटमध्ये सातत्याने प्रभावी कामगिरी केली आहे. आयर्लंडविरुद्धच्या एकमेव कसोटी सामन्यात त्याने घेतलेले पाच बळी हे त्याच्या निवडीमागील प्रमुख कारण होते.

मायकल ब्रेसवेल आणि मार्क चॅपमन यांनी कसोटी क्रिकेट करार क्रमवारीत समाविष्ट न होण्याची विनंती केली आहे. हे दोन्ही क्रिकेटपटू आता केवळ मर्यादित षटकांचे विशेषज्ञ म्हणून केंद्रीय करार यादीत कायम राहतील. बोर्डाने सांगितले की, येत्या काही आठवड्यांत मर्यादित करार देखील जाहीर केले जातील, ज्यामध्ये फिन ॲलन, लॉकी फर्ग्युसन आणि टिम सेफर्ट यांसारख्या क्रिकेटपटूंचा समावेश असू शकतो.

न्यूझीलंड सेंट्रल कॉन्ट्रॅक्ट यादी (२०२६-२७):

टॉम ब्लंडेल, मायकल ब्रेसवेल, मार्क चॅपमन, डेव्हॉन कॉनवे, जेकब डफी, जॅक फॉल्क्स, मिच हे, मॅट हेन्री, काईल जेमिसन, टॉम लॅथम, डॅरिल मिचेल, हेन्री निकोल्स, विल ओ'रूर्क, ग्लेन फिलिप्स, रचिन रवींद्र, मिचेल सँटनर, बेन सियर्स, नॅथन स्मिथ, ब्लेअर टिकनर आणि विल यंग.

---------------

हिंदुस्थान समाचार / वृषाली देशपांडे