नवी दिल्ली, 18 जून (हिं.स.)इंग्लंडने फिफा विश्वचषक २०२६ मध्ये आपल्या सलामीच्या सामन्यात क्रोएशियाला ४-२ ने पराभूत करत शानदार सुरुवात केली. कर्णधार हॅरी केनने दोन गोल केले, तर मार्कस रॅशफोर्ड आणि ज्यूड बेलिंगहॅम यांनी प्रत्येकी एक गोल केला. क्रोएशियाकडून मार्टिन बटुरिना आणि पीटर मुसा यांनी गोल केले. पहिल्या हाफमध्ये दोन्ही संघ २-२ असे बरोबरीत होते, पण इंग्लंडने दुसऱ्या हाफमध्ये दोन गोल करून विजय निश्चित केला.

हॅरी केनने पेनल्टीवर पहिला गोल केला. सुरुवातीला त्याने पेनल्टी चुकवली, पण व्हिडिओ रिव्ह्यूमध्ये असे दिसून आले की शॉट लागण्यापूर्वी क्रोएशियन गोलकीपर डॉमिनिक लिओव्हकोविच आपल्या गोल रेषेवरून पुढे आला होता. केनला आणखी एक पेनल्टीची संधी मिळाली, आणि यावेळी त्याने ती गोलमध्ये रूपांतरित केली. लुका मॉड्रिकने इंग्लिश फुटबॉलपटू नोनी माडुएकेला लाथ मारल्यानंतर ही पेनल्टी देण्यात आली होती.

त्यानंतर केनने डेक्लन राइसच्या कॉर्नर किकवर हेडरद्वारे आपला दुसरा गोल केला. यामुळे त्याच्या आंतरराष्ट्रीय गोलांची संख्या ८१ झाली. विश्वचषकातही त्याचे १० गोल झाले असून, त्याने गॅरी लाइनकरची बरोबरी केली आहे. हे दोघे आता इंग्लंडचे संयुक्तपणे सर्वाधिक गोल करणारे फुटबॉलपटू आहेत. दुसऱ्या हाफमध्ये, इलियट अँडरसनच्या लांब पासवर बेलिंगहॅमने गोल केला. ८५ व्या मिनिटाला, बुकायो साकाच्या पासवर मार्कस रॅशफोर्डने इंग्लंडचा विजय निश्चित केला. इंग्लंडचा पुढील सामना घानाविरुद्ध आहे, तर क्रोएशिया पनामाविरुद्ध खेळेल.

आणखी एका सामन्यात घानाने पनामाचा १-० ने पराभव केला. सामन्याच्या ९५ व्या मिनिटाला केलब यिरेनकायीने केलेल्या निर्णायक गोलमुळे घानाला आघाडी मिळाली. २० वर्षीय यिरेनकायीने ब्रँडन थॉमस असांटेच्या पासवर गोल केला. अखेरीस पनामाने बरोबरी साधण्यासाठी आपले सर्व फॉरवर्ड फुटबॉलपटूला मैदानात उतरवले, पण घानाने त्यांना रोखून धरले. घानाला २०१० नंतर प्रथमच नॉकआऊट फेरीत पोहोचण्याची संधी मिळणार आहे.

---------------

हिंदुस्थान समाचार / वृषाली देशपांडे