नवी दिल्ली, 19 जून, (हिं.स.)। भारतीय टेबल टेनिसपटू मनिका बत्रा हिने २०२६ च्या आशियाई क्रीडा स्पर्धेसाठीच्या भारतीय संघातून वगळल्यानंतर निवड प्रक्रियेवर प्रश्नचिन्ह उपस्थित केले आहे. तिने क्रीडा मंत्री मनसुख मांडविया आणि भारतीय ऑलिम्पिक असोसिएशन (IOA) यांना या प्रकरणाची चौकशी करण्याची आणि निवड प्रक्रिया पारदर्शक, उत्तरदायी व निष्पक्ष असल्याची खात्री करण्याची विनंती केली आहे.

'टेबल टेनिस फेडरेशन ऑफ इंडिया'ने (TTFI) जाहीर केलेल्या संघात जी. सत्यन पुरुष संघाचे नेतृत्व करतील, तर श्रीजा अकुला महिला संघाचे नेतृत्व करेल. महिला संघात श्रीजा अकुला, यशस्विनी घोरपडे, दिया चितळे, सुतीर्था मुखर्जी आणि सिंड्रेला दास यांचा समावेश आहे. मनिका बत्राला राखीव खेळाडूंच्या यादीत ठेवण्यात आले आहे.

सोशल मीडियावर सादर केलेल्या निवेदनात, मनिकाने संघात स्थान न मिळाल्याबद्दल निराशा व्यक्त केली, परंतु निवड निकष ज्या पद्धतीने लागू केले गेले ती बाब अधिक चिंतेची असल्याचे तिने अधोरेखित केले. तिला वगळण्यामागचे नेमके कारण अद्याप सांगण्यात आलेले नाही, असे तिने नमूद केले.

मनिकाने नमूद केले की, सार्वजनिकरित्या उपलब्ध माहितीनुसार, निवड प्रक्रिया ही जागतिक क्रमवारी, राष्ट्रीय क्रमवारी आणि निवड समितीचा निर्णय (विवेकाधिकार) यांवर अवलंबून असते. जर असे असेल, तर हे घटक कसे लागू केले गेले आणि प्रत्येकाला किती महत्त्व (वेटेज) दिले गेले, याबद्दल खेळाडूंना स्पष्टपणे माहिती दिली जावी.

३१ वर्षीय मनिकाने निदर्शनास आणून दिले की तिची सध्याची जागतिक क्रमवारी ५१ आहे, जी तिला 'टॉप ५०' च्या अगदी जवळ आणते. तिने असा युक्तिवाद केला की क्रमवारीतील किरकोळ चढ-उतार सामान्य आहेत आणि केवळ या घटकाच्या आधारे तिला वगळण्याचे समर्थन करणे कठीण आहे.

आपल्या आंतरराष्ट्रीय कामगिरीचा दाखला देत, मनिकाने या हंगामातील सातत्यपूर्ण कामगिरीवर प्रकाश टाकला; यात चीनसह आशियातील बलाढ्य खेळाडूंविरुद्ध मिळवलेल्या महत्त्वपूर्ण विजयांचा समावेश आहे. तिने ठामपणे सांगितले की तिची सध्याची कामगिरी सर्वोच्च आंतरराष्ट्रीय स्तरावर स्पर्धात्मक आहे. तिने हे देखील नमूद केले की, जरी देशांतर्गत स्पर्धांमधील सहभाग हा निवडीचा आधार असला, तरी आंतरराष्ट्रीय स्तरावर नियमितपणे खेळणाऱ्या खेळाडूंना प्रत्येक देशांतर्गत स्पर्धेत सहभागी होणे नेहमीच शक्य नसते. निवड प्रक्रियेतील 'विवेकाधीन अधिकारांच्या' (discretionary power) वापराबाबत प्रश्नचिन्ह उपस्थित करत मणिकाने म्हटले आहे की, जर कोणत्याही टप्प्यावर अशा अधिकारांचा वापर केला जात असेल, तर ती प्रक्रिया पारदर्शक, सुसंगत आणि लिखित स्वरूपात (नोंद असलेली) असायला हवी. तिची निवड न होण्यामागची कारणे, लागू असलेले निकष आणि निर्णय घेण्याची प्रक्रिया यांबाबत तिने फेडरेशनकडून सविस्तर स्पष्टीकरण मागितले आहे.

हे लक्षात घेण्यासारखे आहे की, मणिका बत्रा ही भारतातील सर्वात यशस्वी टेबल टेनिसपटूंपैकी एक मानली जाते. तिने राष्ट्रकुल क्रीडा स्पर्धेत (Commonwealth Games) दोन सुवर्ण, एक रौप्य आणि एक कांस्य पदक जिंकले आहे, तसेच आशियाई क्रीडा स्पर्धेतही कांस्य पदक मिळवले आहे. आशियाई क्रीडा स्पर्धेतील एकेरीच्या प्रकारात 'राउंड ऑफ १६' (अंतिम १६ खेळाडूंचा टप्पा) पर्यंत पोहोचणारी ती पहिली भारतीय खेळाडू ठरली होती.

---------------

हिंदुस्थान समाचार / हर्षदा गावकर