दोहा, 20 जून (हिं.स.)भारताचा स्टार भालाफेकपटू नीरज चोप्राचे दोहा डायमंड लीगमध्ये झालेले पुनरागमन निराशाजनक ठरले. या हंगामातील आपल्या पहिल्याच स्पर्धेत तो अंतिम फेरीसाठी पात्र ठरू शकला नाही. स्पर्धेत पुनरागमन करताना, त्याने ८५.६९ मीटरच्या सर्वोत्तम कामगिरीसह चौथे स्थान पटकावले. पण, त्याने राष्ट्रकुल क्रीडा स्पर्धेतील आपले स्थान निश्चित केले. त्याने ८२.७७ मीटरच्या भालाफेकीसह आपले स्थान मिळवले. २०२६ हंगामातील आपल्या पहिल्याच स्पर्धेत त्याने पात्रतेचा निकष पार केला. चोप्राने दोहामध्ये आपल्या दुसऱ्या प्रयत्नात ही कामगिरी केली. सर्वात महत्त्वाचे म्हणजे, ही कामगिरी ८२.६१ मीटरच्या राष्ट्रकुल क्रीडा स्पर्धेच्या पात्रता निकषापेक्षा सहजच वरचढ ठरली.

स्पर्धेची सुरुवात त्याच्यासाठी अत्यंत निराशाजनक झाली होती.नीरज पहिल्याच फेरीत अपात्र ठरला. त्याच्या दुसऱ्या भालाफेकीमुळे तो राष्ट्रकुल क्रीडा स्पर्धेसाठी पात्र ठरला, तर त्याच्या तिसऱ्या भालाफेकीने हे सिद्ध केले की, नीरज दोहामध्ये पूर्ण फॉर्मात होता. त्याने ८५.६९ मीटरचा टप्पा गाठला, ज्यामुळे तो शर्यतीत तिसऱ्या स्थानी पोहोचला. त्याचा चौथा थ्रो, ८३.४५ मीटरचा होता. पण हा थ्रो त्याला पहिल्या तीनमध्ये स्थान मिळवन देऊ शकला नाही.

दुखापतीनंतर नीरजचे हे पुनरागमन होते. दुखापतीमुळे आलेल्या दीर्घ विश्रांतीनंतर तो पहिल्यांदाच स्पर्धेत सहभागी झाला होता. या भारतीय खेळाडूने मागील वर्ष पाठीच्या दुखण्यातून सावरण्यात घालवले होते, ज्यामुळे त्याच्या तयारीला अडथळा आला होता आणि आंतरराष्ट्रीय स्तरावरील त्याच्या सहभागावर मर्यादा आल्या होत्या. दोहा डायमंड लीग ही नीरजच्या २०२६ च्या मोहिमेतील पहिली स्पर्धा आणि त्याच्या हंगामातील एक महत्त्वाचा टप्पा होता.

---------------

हिंदुस्थान समाचार / वृषाली देशपांडे