डॅलस (अमेरिका), २१ जून (हिं.स.)मेजर लीग क्रिकेटमध्ये (एमएलसी) एमआय न्यूयॉर्क संघाकडून खेळणाऱ्या अनुभवी कायरन पोलार्डने एक महत्त्वपूर्ण विक्रम प्रस्थापित केला आहे. पोलार्डने आपला देशबांधव ख्रिस गेलला मागे टाकत टी-२० क्रिकेटच्या इतिहासातील सर्वाधिक धावा करणारा क्रिकेटपटू बनण्याचा मान मिळवला आहे.
एमएलसी २०२६ मध्ये वॉशिंग्टन फ्रीडम संघाविरुद्ध शानदार शतक झळकावून पोलार्डने हा पराक्रम केला. त्याने ५६ चेंडूंमध्ये ११ चौकार आणि चार षटकारांसह नाबाद १०० धावा केल्या. या शतकामुळे पोलार्डच्या टी-२० क्रिकेटमधील एकूण धावा १४,५८२ झाल्या आहेत, तर ख्रिस गेलच्या १४,५६२ धावा आहेत. यामुळे पोलार्ड टी-२० क्रिकेटमधील सर्वाधिक धावा करणारा क्रिकेटपटू ठरला आहे. या दोन क्रिकेटपटूंच्या पाठोपाठ ऍलेक्स हेल्स (१४,४४९), जोस बटलर (१४,३७१), डेव्हिड वॉर्नर (१४,२८४) आणि विराट कोहली (१४,२१८) यांचा क्रमांक लागतो.
पोलार्डची ऐतिहासिक खेळी त्याच्या संघाला विजय मिळवून देण्यात अपयशी ठरली. प्रथम फलंदाजी करताना, वॉशिंग्टन फ्रीडमने पाच गडी गमावून २४५ धावांचा डोंगर उभा केला. प्रत्युत्तरात, एमआय न्यूयॉर्कला त्यांच्या निर्धारित २० षटकांत सहा गडी गमावून केवळ २१५ धावाच करता आल्या आणि ते ३० धावांनी सामना हरले.
पोलार्ड केवळ धावांच्या बाबतीत आघाडीवर नाही, तर टी२० क्रिकेटमध्ये सर्वाधिक सामने खेळणारा क्रिकेटपटूही आहे. त्याने आपल्या कारकिर्दीत ७३६ टी२० सामने खेळले आहेत, जो या फॉरमॅटमधील एक विक्रम आहे. त्याच्या नावावर दोन शतके आणि ६७ अर्धशतके आहेत. ७०० पेक्षा जास्त टी२० सामने खेळणारा पोलार्ड हा एकमेव क्रिकेटपटू आहे.
वेस्ट इंडिजचा माजी कर्णधार पोलार्डने आंतरराष्ट्रीय क्रिकेटमधून निवृत्ती घेतली आहे. पण तो फ्रँचायझी क्रिकेटमध्ये सक्रिय आहे. मुंबई इंडियन्सचा दीर्घकाळचा क्रिकेटपटू असलेल्या पोलार्डने आयपीएलमधूनही निवृत्ती घेतली आहे आणि सध्या तो संघाचा फलंदाजी प्रशिक्षक म्हणून काम पाहतो.
---------------
हिंदुस्थान समाचार / वृषाली देशपांडे
